HARI DUA, 18 JANUARI 2022
LAWAS: Perintah Sarawak semampai chakah nentuka pengelantang pengidup rayat di menua pesisir nyengkaum di Lawas.
Sapit Kepala Menteri, Datuk Amar Awang Tengah Ali Hasan madah, diatu mayuh projek baka ai, karan enggau telekomunikasyen benung digaga.
Ku iya, pekara nya bela nyadika pengering ngagai Sarawak matak mayuh agi orang beranakka puku datai ari menua bukai.
“Ari perengka guna ke chukup ukai semina nentuka pengelantang pengidup rayat kitai tang mega tau bendar matak penatai orang beranakka puku ke Lawas,” pia iya madah maya pengerami selamat beserimbai enggau pemujur Gabungan Parti Sarawak (GPS) Zon Punang enggau pengerami nyuaka pemeri beg sekula SK Punang.
Datuk Amar Awang Tengah mega madah, Lawas menua ke engkeman alai orang menua bukai datai beranakka puku kelimpah bisi pengelebih baka ari minyak enggau gis.
“Nyema nyadi, tu deka muka awak gawa ti bekenaka 15,000 iku pengereja kelimpah ulih nyungkakka penatai pemisi nengah pengawa dagang temuai sereta dagang mit enggau jelan pemesai.
“Semua pemujur tu bepun ari perintah kitai perintah ti entap sereta likun,” ku iya madah baru.
Sama bela datai maya tu iya nya Sapit Menteri Perengka Pengangkut Malaysia ke mega Kaban Parlimen Lawas Dato’ Henry Sum Agong. -EDISI UKAS
