Pemujur GPS Kelai Rayat Nerima Manah Tuju Pegai GPS

HARI DUA, 18 JANUARI 2022

KUCHING: Pemujur Gabungan Parti Sarawak (GPS) maya Pengawa Bepilih Besai Nengeri Sarawak Ke-12 tu tadi mandangka rayat ba nengeri tu nerima manah ‘polisi’ enggau tuju pegai tauka ‘dasar’ GPS.

Menteri Dagang Temuai, Seni Enggau Main Asal ke mega Kaban Parlimen Batang Sadong, Dato’ Sri Nancy Shukri madah, pekara nya ti ditumbuhka Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Johari sebagi ari pengawa nentuka pengelantang rayat.

Kelimpah ari nya, Dato’ Sri Nancy Shukri madahka pemujur GPS serak tu ngelai pengandal rayat ngagai pegai pengari rayat GPS bejalaika tanggung pengawa meri servis ke manah.

“Pengering GPS kenyau ari suba nyentuk ke diatu seruran nentuka pengelantang pengidup rayat kelimpah semampai nyukung polisi ti udah ditumbuhka perintah.

“Perintah GPS ngelama tu endang ngemeranka polisi ti engkeman ungkup rayat laban semua batang pengawa enggau pekara dikereja kitai udah dibantai maya pengawa bepilih besai tu tadi ngujungka GPS menang besai,” ku iya madah.

Dato’ Sri Nancy Shukri bejaku munyi nya ba program makai selamat ngerami pemujur GPS DUN N.25 Simunjan di Raia Hotel kena Hari Enam tu tadi.

Berebak enggau nya, Kaban Kunsil Nengeri (ADUN) Simunjan, Awla Dris madah, pengawa bepilih tu tadi nempa sejarah besai alai GPS mujur menang ba 76 ari 82 penuduk Kunsil Nengeri (DUN).

Kelimpah ari nya, iya madahka diri semampai chakah mai pemansang ti dikingin rayat di Simunjan.

“Kitai di DUN N.25 Simunjan chukup benasit manah ketegal dikelingi DUN dipegai Kepala Menteri Sarawak ba DUN N.26 Gedong, Menteri di DUN N.27 Sebuyau sereta Menteri Muda di DUN N.24 Sadong Jaya ti mai pengelebih ngagai kitai ba kandang endur tu,” ku iya nerang.

Bela bisi datai ngulu program tu iya nya Menteri Muda Pemansang Infrastruktur Enggau Penyangkai Kapal ke mega ADUN N.24 Sadong Jaya,  Ir. Aidel Lariwoo, Residen Sitak Samarahan, Brahim Lumpu, Pegawai Pelilih Simunjan Abdul Khalid Manap, Sekretari Majlis Daerah Simunjan, Mohd Rizal Zakaria sereta Sekretari Politik Menteri Dagang Temuai, Seni Enggau Main Asal Malaysia, Mohammed Kamaluddin Effendi enggau Sapit Tuai Pampang N.25 Simunjan ke mega Chairman Program, Bojeng Ali. -EDISI UKAS

add comment