Infrastruktur Pelajar Pelilih Lawas Deka Dikemanahka

HARI TIGA, 19 JANUARI 2022

LAWAS: Palan Servis DUN Bukit Sari nengah Biro Pelajar deka nandu pengawa nyaup nembiak nampung pelajar ngagai tikas ke tinggi agi.

Sapit Kepala Menteri, Datuk Amar Awang Tengah Ali Hasan madah, bantu nya nyengkaum mata duit dikena nyaup mayar tambang kelimpah perengka guna pelajar ke bukai baka laptop.

Kelimpah ari nya iya madah, institusyen pelajar di Lawas mega bela deka dikemanahka.

“Kitai nemu mayuh sekula ditu udah kelalu lama lalu pia mega kuarters pengajar enggau buding nembiak sekula.

“Ba sitak Limbang tu, agih belanja ari Ejensi Pemansang Menua Pesisir (NRDA) udah diungkupka dikena ngaduka sekula, ngaga kuarters pengajar enggau balai mensia mayuh sekula,” pia ku iya madah.

Iya bejaku munyi nya ba pengerami nyuaka pemeri beg sekula pelilih lawas, nyuaka geran Projek Menua Pesisir (MRP) enggau laptop ngagai nembiak IPT, kena Hari Satu tu tadi.

Nambahka jaku iya, ku Datuk Amar Awang Tengah madah, Perintah Sarawak chakah deka nentuka infrastruktur pelajar semampai dikemanahka nyengkaum Opis Pelajar Pelilih Lawas sereta nyungkakka pemanah servis internet.

“Ba arus penyambung, beberapa iti tiang komunikasyen deka digaga di pelilih Lawas kelimpah kitai nambahka pemesai bungkur ‘fiber optic’,” ku iya madah baru.

Sama bela datai ba pengerami tu iya nya Sapit Menteri Perengka Pengangkut Malaysia ke mega Kaban Parlimen Lawas Dato’ Henry Sum Agong. -EDISI UKAS

add comment