JPBB Bintulu Nyikap Diri Napi Ampuh Bah

HARI TIGA, 19 JANUARI 2022

BINTULU: Perintah Sarawak nengah Opis Parit Enggau Entali Ai (DID) Sarawak udah ngaga sapat dikena nekat ai Sungai Sebiew tama ngagai genturung pendiau maya ujan bangat.

Chairman Komiti Penyangga Penusah Sitak (JPBB) Bintulu Datu Jack Aman Luat nengah penerang media iya kena Hari Dua madah, projek ngaga sapat tu ulih ngurangka penusah bah ngenyit tau nyadi.

“Ba Kampung Kemunting, projek ‘Improvement To Sungai Sebab at Kampung Kemunting’ diatu benung digaga lalu dipadahka ulih ngurangka risiko ampuh bah nyadi nyema projek tu udah tembu ila,” ku iya madah.

Dulu ari nya, Datu Jack Aman Luat disempulang Tuai Polis Pelilih Bintulu Supt. Zulkipli Suhaili enggau beberapa ejensi ari baruh JPBB Bintulu datai ngabas Gem Park enggau Kampung Kemunting ke udah dituntung bah ngenyit kena Hari Satu tu tadi.

Nerang enggau silik, Datu Jack Aman ke mega Residen sitak Bintulu madahka raban iya diatu udah nyikap diri napi sebarang penusah bah maya musim landas tauka Monsun Timur Laut. 

“Semua ejensi ari tiap iti pelilih mega udah dipinta nyikap diri bejalaika operasyen enda ngira jam.

“Bisi 27 iti Palan Ngenduh Sementara (PPS) enggau tiga iti penyangkai ari mua udah disedia lalu deka diaduka Opis Pengelantang Raban Bansa (JKM) Sitak Bintulu nyengkaum perengka guna diri enggau perengka ke bukai ti bekaul,” ku iya nerang.

Berindik ari pekara nya, mensia mayuh dilalau semampai nyaga pengelikun diri lebih agi sida ke diau ba palan mudah ampuh ai lalu semampai besedia mindah enggau lengkas ngagai PPS nyema diasuh pindah. -EDISI UKAS

add comment