Pengeransing, Pemujur GPS Ungkup Rayat Kemaya Hari, Nembiak Rebak Dudi

HARI TIGA, 19 JANUARI 2022

LAWAS: Pengeransing enggau pemujur Gabungan Parti Sarawak (GPS) ukai semina ungkup rayat kemaya hari tang mega ungkup pengidup nembiak rebak dudi.

Sapit Kepala Menteri Datuk Amar Awang Tengah Ali Hasan madah, kuing dudi hari Sarawak bepanggai ba rayat Sarawak empu.

“Kitai udah menang 76 ari 82 penuduk ngelai rayat pechayaka pegai GPS. Pengawa tu deka dipajakka kitai ngambika ulih mai pemansang ngagai menua Sarawak. 

“Kitai mega ulih nandu pengawa pemansang dikena meri pengelantang ngagai pengidup rayat ngambika rayat nadai idup seranta,” ku iya bejaku maya Program Makai Selamat beserimbai enggau pemujur GPS Zon Jalan Punang sereta nyua beg sekula ngagai beberapa iku nembiak SK Belipat di Dewan Kampung Batong, Jalan Punang kena Hari Satu tu tadi.

Ba pengerami ke sebaka, Datuk Amar Awang Tengah madah, Perintah Sarawak ukai semina ngemeratka projek besai tang mega bemacham bengkah projek menua pesisir kelimpah disungkakka agi enggau pengawa nyendiaka perengka guna ngagai semua rayat.

“Kitai deka ngemeratka pemansang infrastruktur nyengkaum sektor pelajar baka ba sekula ti mesti dikemanahka. Pia mega, masjid, surau enggau gerija mega deka dikemanah. Kitai mega beratka pemansang ari sukut pengarap awakka ulih nempa rebak dudi ngembuan ulah ke manah.

“Gerempung mega deka disaup bejalaika program ti mandangka ulah positif ngagai mensia mayuh. Program ngemanahka rumah mega deka dipajakka,” ku iya nerang.– EDISI UKAS

add comment