Pulau Bruit Tau Bendar Dikemansang Nyadi Palan Mansutka Asil Pemakai

HARI EMPAT, 20 JANUARI 2022

SEMOP: Pulau Bruit tau bendar dikemansangka nyadi palan mansutka asil pemakai tauka ‘food basket’, ku Menteri Muda Pekara Korporat, Pemadah Enggau Unit Komunikasi Awam (UKAS), Datuk Abdullah Saidol.

Ketegal nya, iya andal amat Perintah Sarawak ke baru ke udah nerima sukung besai ari rayat deka nandu pengeransing ngemerat sereta ngungkupka agih belanja ke besai dikena nyungkakka pengawa betanam betupi enggau berikan menua nya.

Iya ke mega Kaban Kunsil Nengeri (ADUN) Semop madah, ari pengawa nyaup ngemansangka orang berikan enggau betanam betupi, pengawa sarawak bepanggai ba barang pemakai import tau dikurangka agi.

“Orang berikan di Pulau Bruit nyauka 2,000 iku ngerejister ba gerempung kelimpah sida ke bekebun.

“Nya alai, aku ngasaika Pulau Bruit tu tau bendar nyadi palan mansutka asil pemakai tauka ‘food basket’.

“Lalu aku ngarapka Perintah Sarawak majakka pengeransing ngemerat sereta meri agih belanja ke besai ngagai rayat ukai semina di Pulau Bruit aja tang mega ba endur bukai,” pia ku iya maya dirandau UKAS ba pengerami nutup Program Jangkauan Komuniti Pertanian (Agricop) Pulau Bruit ba balai mensia mayuh Kampung Tekajong, kena Hari Tiga.

Nerang enggau silik, iya madah, bisi Rm1.5 juta bantu betanam betupi ungkup taun 2020 enggau 2021 diberi ngagai 290 iku penyereta.

Ku iya madah, Menteri Pengawa Betanam Betupi Moden enggau Pemansang Kandang Menua, Dato Sri Dr. Stephen Rundi Utom deka semampai chakah ngemeratka program nya ti dipeda nyadi chara ke engkeman nyaup ngemansangka tikas sosioekonomi rayat menua pesisir.

“Ba kandang mengeri bisi chara iya empu. Tang ba menua pesisir, sida ke betanam betupi enggau orang berikan nyadi orang ti ngeluarka penatai pemakai ngagai tiap buah rumah ba nengeri enggau menua tu,” ku iya madah baru.

Berebak enggau nya, iya minta rayat DUN Semop ulih numbuhka gerempung ngambika program enggau bantu ulih dipejalaika enggau mujur.

Ba pengerami nya, Datuk Abdullah bisi nyuaka Projek Mit Menua Pesisir (MRP) enggau penyampau RM66,800.

Penerima MRP tu iya nya JK Masjid Al-Qudwah Kg Bruit (RM3000), JK Masjid lama Kg Bruit (RM3000), JK Masjid Darul Ibadah Kg Tekajong (RM3000), JK Masjid Darul Ibadah Kg Penipah (RM3000), JK Masjid Darul Islah Kg Salah Kecil (RM3000), JK Masjid Al-Quddus Kg Betanak (RM3000) enggau JK Masjid Al-Firdaus Kg Penibong (RM3000).

Kelimpah ari nya, MRP nya mega diberi ngagai JK Surau Al-Azim Kg Tekajong (RM1500), JK Surau Kg Penipah (RM1500), JK Surau Kg Penuai (RM1500), Pertubuhan Gerakan Prihatin Pulau Bruit (RM5000), JKKK Kg Tekajong (RM3000), Kumpulan Hadrah Kg Tekajong (RM3300) enggau Saberkas Semop (RM30,000). – EDISI UKAS

add comment