RM48 Bilion Diungkup Ngaduka Pemansang Infrastruktur Di Sarawak

HARI EMPAT, 20 JANUARI 2022

KUCHING: Perintah Sarawak enggau Perintah Besai udah ngungkupka agih belanja RM48 bilion dikena ngaduka macham projek infrastruktur ba nengeri tu.

Sapit Kepala Menteri ke mega Menteri Infrastruktur enggau Pemansang Penyangkai Kapal (MIPD) Sarawak, Datuk Amar Douglas Uggah Embas madah, ari pemayuh penyampau agih nya, projek infrastruktur mesti digaga enggau manah sereta tembu nitihka timpuh ke udah ditetapka.

“Nya alai, kitai deka meda semua ejensi ba baruh MIPD patut nimbal pekara tu nengah ulah besaup gawa nyadi siti tim nentuka semua projek mujur ditembuka,” pia ku iya madah.

Bejaku maya Pengerami Nyuaka Pangku Pengawa Ba Opis Menteri Infrastruktur enggau Pemansang Penyangkai Kapal Sarawak di Kuching kena Hari Tiga, iya madah, pemujur nembuka projek beguna bendar dikena nyaup bejadika juluk ati nengeri tu ti deka meda rayat bepenatai pemisi besai manggai taun 2030.

Nambahka jaku iya, Datuk Amar Douglas Uggah madah ngagai pegawai enggau ejensi ba opis menteri iya, rayat andal amat sida ngemujurka semua projek ke udah dikemendarka lebih agi rayat udah meri sukung ke besai maya pengawa bepilih nengeri empai lama tu tadi.

“Sida udah meri sukung ke besai ngagai kitai lalu sida mega andal amat kitai bejadika nama ti udah disemaya ba pengawa bepilih.

“Lalu pia mega perintah dekaka kita ngemujurka semua projek.

“Enti kitai ulih ngena agih belanja ke udah diberi enggau manah, kitai mega ulih nyaup ngemansangka ekonomi lalu rayat deka ngasaika pengelantang.

“Tang enti agih belanja nya enda dikena enggau manah tauka projek enda mujur ditembu, tuju pengerembai ekonomi enda ulih dipenyadi.

“Kepala Menteri Datuk Patinggi Tan Sri Dr Abang Abdul Rahman Zohari Tun Datuk Abang Openg udah ngayanka pengandal iya Sarawak ulih ngerikod pengerembai ekonomi lapan peratus ninting taun udah taun 2030 ila,” ku iya madah baru.

Kelimpah ari nya, iya mega madahka Kepala Menteri deka meda Opis Wang Nengeri ngiga chara ke engkeman ba sistem tender milih kontriktor projek.

“Kitai deka meda kontriktor ke dipilih ngaduka projek enggau mujur sereta tembu nitihka langgur enggau timpuh ke udah ditetapka,” pia ku iya.

Ba pengerami nya, Datuk Amar Douglas Uggah nyuaka pangku pengawa Menteri Muda Infrastruktur enggau Pemansang Penyangkai Kapal ngagai Datuk Majang Renggi enggau Aidel Lariwoo.

Iya mega nyuaka pangku pengawa ngagai ex-Menteri Muda MIPD, Datuk Julaihi Narawi ke udah dichiri megai pengawa nyadi Menteri Utiliti enggau Telekomunikasyen. -EDISI UKAS

add comment