Empat Iku Pengari Rayat GPS, Senator Mutarka Isu, Penanggul Ditapi Rayat Di Sibu.

HARI ENAM, 22 JANUARI 2022

SIBU:  Empat iku pengari rayat Gabungan Parti Sarawak (GPS) deka ngiga chara mutarka isu enggau penanggul ti ditapi rayat di Sibu.

Raban tim tu iya nya Kaban Kunsil Nengeri (ADUN) Nangka Dr Annuar Rapaee, ADUN Bukit Assek Joseph Chieng Jin Ek, ADUN Dudong Datuk Seri Tiong King Sing enggau ADUN Pelawan Michael Tiang kelimpah Senator Robert Lau.

Dr Anuar yang ke mega Menteri Muda Pelajar, Inovasyen Enggau Pemansang Pengelandik madah, tiap iku raban pengari rayat megai tanggung pengawa mutarka sesebengkah isu enggau pekara ti nyadi.

“Kitai udah numbuhka raban tim ari pengari rayat GPS lalu kitai mega deka merambu penanggul ke nyadi baka ai, ampuh bah, sistem parit, perengkaguna pengangkut, ‘rumah kos rendah’ enggau isu servis sepital.

“Tiap iku bisi tanggung pengawa diri empu..kitai mega deka semampai bekerejasama,” ku iya.

Dr Annuar madah munyi nya maya ditemu pemberita sepengudah Program Licha Pemansang Baru  Bukit Assek di Sibu, Hari Enam.

Kelimpah ari nya, Dr Annuar nambahka raban tim nya ukai semina chakah mutarka isu ditapi rayat, tang mega meri servis ke manah lebuh nyadi pengari rayat dikena nyapai juluk nyadi ‘Sibu Baharu’.-EDISI UKAS 

add comment