Sekula Di Sarawak Patut Ngemeratka Pengelikun, Nyeliah Pekara Ti Enda Disadang Nyadi.

HARI ENAM, 22 JANUARI 2022

KUCHING: Semua sekula ba nengeri tu dipinta ngemeratka pengelikun awakka ulih nyeliah ari pekara ti enda disadang nyadi.

Menteri Pelajar, Inovasyen Enggau Pemansang Pengelandik Sarawak, Datuk Roland Sagah Wee Inn madah, lebuh beratika pekara ti udah nyadi nuntung siku nembiak labuh ari beranda ba Sekula Primari  (Sk) Long Bemang kemari, raban iya udah bejalaika pengawa ti patut ambikka pekara ke sebaka enda nyadi.

Datuk Roland nerangka nembiak indu ke labuh semina bakal mimit lalu dibai ngagai sepital sebedau diasuh pansut.

“Aku deka mesan semua sekula di Sarawak semampai bejejaga awakka kitai ulih nentuka pengelikun bala nembiak, pengajar, bala staf enggau temuai ke datai,” ku iya.

Lebuh meri penerang ngagai Unit Komunikasi Awam Sarawak (UKAS) kena Hari Enam, iya madahka projek ngaga baru begunan Sk Long Bemang udah dikemendarka ba baruh ‘Projek Sekolah Daif RM1 Bilion’ dipelabakka beungkus sepenyampau RM6 juta lalu ditender kenyau ari taun 2021.

Taja pia, pengawa tender sebedau nya enda bejalai enggau mujur, lalu deka ditender baru kena bulan Februari taun tu.-EDISI UKAS 

add comment