Sarawak Deka Bejalaika VTL, Netapka Tagit 1.2 Juta Penatai Temuai Ari Menua Bukai Taun 2022

HARI MINGGU, 23 JANUARI 2022

KUCHING: Sarawak deka bejalaika Vaccinated Travel Lane (VTL) nengah kerejasama raban berkuasa ti bekaul enggau  menua bukai. 

Menteri Dagang Temuai, Industri Kreatif Enggau Seni Pemerindang, Dato Sri Abdul Karim Rahman Hamzah madah, VTL tu deka nyungkakka agi ekonomi dagang temuai kelimpah muka entara menua Sarawak ngagai menua bukai baka ba Singapura, Brunei enggau Indonesia.

“Sarawak diatu udah ngalih ngagai Pelin Penyuman Menua  (PPN) Fasa 4 lalu mayuh langgur aktiviti deka dikemendarka nitih atur pengerai enggau pengelikun ti udah ditetapka,” ku iya nerang.

Dato Seri Abdul Karim, madah munyi nya ba Program  Amanat Dagang Temuai, Industri Kreatif Enggau Seni Pemerindang (MTCP) bepalan ba The Waterfront Hotel Kuching, Hari Enam.

Nerang enggau silik, iya ngarapka pengelekai COVID-19 deka ngalih ngagai Fasa Endemik enda lama agi lalu opis menteri iya netapka tagit 1.2 juta temuai ari menua bukai datai ke Sarawak taun 2022.

Berebak enggau nya, Dato Seri Abdul Karim madah,  Kimpin ‘Sia Sitok Plus’ ke udah dipenyadi empai lama tu tadi nengah kerejasama Malaysia Airlines di Kuala Lumpur, iya nya inisiatif sepengudah Sia Sitok 1.0, Sia Sitok 2.0 enggau Palan Endur Bemalam ti udah digaga kenyau taun 2020 enggau 2021 dikena meri insentif ngagai Dagang Temuai Domestik.-EDISI UKAS 

add comment