Adu Chara Baru Ngaul Pengundi 18 Taun

HARI SATU, 24 JANUARI 2022

ASAJAYA: Pengereja pengawa parti ba Kunsil Nengeri (DUN) Asajaya dipinta nyerenih baru chara ngaul raban nembiak ke udah dikemendarka ngundi dikena napi Pengawa Bepilih Besai Ke-15 (PRU-15) ti deka datai.

Menteri Dagang Temuai, Industri Kreatif enggau Seni Pemerindang Sarawak, Dato’ Sri Abdul Karim Rahman Hamzah madah, pengawa nya beguna ketegal pengawa rejister Undi-18 digaga enggau automatik berengkah bulan tu.

Ku iya, pengundi raban nembiak maya PRU-15 tu deka mai ubah ke besai ngagai chura politik menua.

“Pemujur kitai ba Pengawa Bepilih Besai Sarawak Ke-12 (PRN-12) tu tadi enda ulih baka nya belama enti kitai enda ngaduka sereta beratika Undi-18 tu enggau chara ke engkeman,” pia ku iya madah maya Pengerami Selamat Pemujur PRN-12 N.15 Asajaya di Kompleks Lumba Asajaya, kena Hari Enam.

Iya ke mega Kaban Kunsil Nengeri (ADUN) Asajaya madah, DUN Asajaya aja deka nambah 5,700 iku pengundi baru.

“Naka ke diatu pemayuh tubuh ke udah ngerejister ngundi ba DUN tu bisi 12,349 iku.

“Nya alai, kitai patut ngaduka pengawa ke bekaul berengkah ari diatu ngambika raban nembiak 18 taun ke atas bela ulih meda pengeransing Gabungan Parti Sarawak (GPS) gawaka rayat lalu tau matak sukung sida ngagai kitai,” ku iya madah baru.

Pengerami sehari nya bela digulu Kaban Parlimen Kota Samarahan, Rubiah Wang, Sekretari Politik Kepala Menteri, Buang Bolhassan sereta bala bukai. -EDISI UKAS

add comment