Pemidang Niang Datuk Simon Dembab Maja Pengelenyau Besai Ngagai Sarawak

HARI SATU, 24 JANUARI 2022

KUCHING: Pemidang Ex-Sapit Kepala Menteri Sarawak Datuk Simon Dembab Maja kena Hari Enam tu tadi pengelenyau besai ngagai nengeri tu.

Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madahka niang siku orang ke udah mai penegap ngepunka pengawa politik ba nengeri tu kenyau ari taun 1970 kelia.

“Maya niang nyadi raban kabinet nengeri suba, iya bela nyaup nentuka penegap perintah maya nya.

“Niang siku ari orang ke ngepunka perintah ‘campuran’ lalu nyadi perintah Barisan Nasional maya taun 1970 ngujungka nengeri Sarawak ngembuan politik ti tegap nyentukka saharitu.

“Kitai berasai sinu laban udah lenyau siku peranak Sarawak ti udah mayuh mai budi ngagai Sarawak,” ku iya madah maya meri basa kepenudi ngagai niang Datuk Simon Dembab Maja di Kuching, kena Hari Satu.

Bela bisi datai maya nya Sapit Kepala Menteri, Datuk Amar Douglas Uggah Embas, Menteri Dagang Dalam Nengeri enggau Pekara Bebeli Barang, Dato’ Sri Alexander Nanta Linggi, Menteri Betanam Betupi Moden enggau Pemansang Kandang Menua, Datuk Seri Dr. Stephen Rundi Utom, Speaker DUN Sarawak, Tan Sri Datuk Amar Mohamad Asfia Awang Nassar, Menteri Muda Betanam Betupi Moden enggau Pemansang Kandang Menua, Martin Ben, Menteri Muda Nembiak, Lumba enggau Pemansang Dagang, Datuk Gerald Rentap Jabu, Menteri Bekal Kuasa enggau Pengelikun Rampa Menua, Dr. Hazland Abang Hipni sereta Menteri Muda ba Opis Kepala Menteri (Integriti & Ombudsman), Datuk Juanda Jaya. 

Datuk Simon Dembab Maja beumur 85 taun dipadahka nadai ba Palan Perubat Swasta di Kuching kena Hari Enam tu tadi.

Niang ninggalka siku balu, Datin Rosalind Sitie Jemeni, tiga iku anak, tiga iku ucu enggau dua iku ichit.

Niang Datuk Simon Dembab Maja deka dianjung ngagai menua asal iya di Selindung, Engkelili kena Hari tiga.-EDISI UKAS

add comment