Perintah Sarawak Ngaduka Tiga Pekara Dikena Nentuka Pengentap Penatai Nengeri

HARI SATU, 24 JANUARI 2022

KUCHING: Perintah Sarawak chakah ngemujur tiga batang pekara ba bajet 2022, nyengkaum majak ngemeranka pengawa ngaduka macham bengkah ekonomi ba tuju ngenegapka agi tikas penatai nengeri tu.

Kepala Menteri Sarawak, Datuk Patinggi Tan Sri Dr Abang Abdul Rahman Zohari Tun Datuk Abang Openg madah, batang pekara tu lebih agi disungkakka ba sukut pengawa betanam betupi moden, infrastruktur, pemansang dagang temuai enggau ngelengkaska pemansang modal mensia.

“Tu nyengkaum numbuhka ‘Dana Kedaulatan Sarawak’ lalu kami ngarapka pekara nya  ulih negapka tikas penatai pemisi jemah ila.

“Pia mega perintah deka ngerumban atur ngemujurka transformasyen menua pesisir ngambika ulih nyungkakka penatai pemisi nengeri,” ku iya bejaku maya ba pengerami Sarawak Entrepreneur Of The Year (EOYS) 2021 Awards di Kuching, kena Hari Satu.

Nambahka jaku iya, Kepala Menteri mega madah, pun pekara ke ulih ngemujurka juluk ati Sarawak nyadi nengeri mansang manggai taun 2030 bepanggai ba pengawa dagang sarawak.

“Perintah nengeri deka nyungkakka pengawa promosyen dagang enggau beranakka puku ngagai rayat Sarawak ke bisi ngembuan ati deka ngemansang sereta bejalaika projek sida,

“Pekara tu endang beguna bendar dikena ngemansangka infrastruktur teknologi pemadah enggau komunikasyen (ICT) nengeri ngambika rayat mansang seririh enggau pengerembai ekonomi kelimpah matak pemeranak puku ba sektor komputer, data analisis, robotik enggau internet,” ku iya nerang.-EDISI UKAS

add comment