RM220,000 Diagih Dikena Nyungkakka Tikas Pemansang Di Kampung Duyoh

HARI SATU, 24 JANUARI 2022

BAU: Agih belanja sepenyampau  RM220,000 udah dikemendar dikena nyaup ngaduka pemansang di Kampung Duyoh.

Menteri Muda Perengka Pengangkut II Sarawak, Dato Henry Harry Jinep madah, ari penyampau nya  RM150,000 diungkupka dikena ngaga gelanggang futsal nengah belanja Projek Transformasyen Menua Pesisir (RTP) taun 2022.

Kelimpah ari nya, agih Projek Mit Menua Pesisir (MRP) 2022 bela diungkupka dikena ngemanahka rumah Gawai enggau penyampau RM10,000 sereta balai mensia mayuh Kampung Duyoh beungkus RM30,000 dikena masang siling enggau dinding.

Kelimpah ari nya, MRP  RM30,000 mega dikemendar ungkup Jagoi Action Development Committee (JADC).

Dato Henry ke mega Kaban Kunsil Nengeri (ADUN) Tasik Biru madahka penyampau agih nya maya ngulu program begulai enggau mensia mayuh Kampung Duyoh kena Hari Minggu tu tadi.

Ba pengawa ke sebaka, Dato Henry ngenataika jaku terima kasih ngagai sukung ari peranak Kampung Duyoh laban udah mai pemujur ngagai Gabungan Parti Sarawak (GPS) maya pengawa bepilih besai nengeri apin lama.-EDISI UKAS

add comment