Kaul Manah Pengari Rayat Enggau Mayuh Ejensi Beguna Dikena Ngemujur Pemansang

HARI DUA, 25 JANUARI 2022

SERIAN: Kaul manah enggau ulah besaup pengari rayat enggau ejensi bukai beguna bendar dikena ngemujurka pemansang sereta nentuka pemanah gawa ngagai rayat.

Kaban Kunsil Nengeri (ADUN) Tebedu, Dr Simon Sinang Bada madah, pemansang mega bepun ari pemanah kaul ejensi nengeri enggau perintah besai nyengkaum pemansang ba Tebedu.

“Tanggungpengawa siti-siti ejensi patut dikemujurka nengah chara besaup.

“Lalu ari nya, kitai meri jaku gaga ngagai Kaunsil Pelilih Serian (MDS) ke udah ngayanka pemujur gawa ari macham bengkah servis ngagai rayat di DUN Tebedu,” pia ku iya madah.

Iya bejaku munyi nya maya datai ngulu program meri penerang sentang projek ke digaga nengah Sistem Penerang Rikod-Rikod Jalai Alun Malaysia (MARRIS), Projek Transformasyen Menua Pesisir (RTP) enggau Program Langgur Pemansang Malaysia Lumpar Ke-12 (RKM-12) ungkup DUN Tebedu, kena Hari Satu.

Nambahka jaku iya, Dr Simon Sinang madah, MDS nyadi ‘bakih’ macham bengkah ejensi ba sitak Serian lalu udah ngaduka mayuh pengawa ke besai reti ngagai pemansang ungkup rayat ba Tebedu.

Ba pengerami nya, Sekretari MDS, Constantine Jones Noeb madahka opis sida deka meri kerejasama enggau sukung ngagai ADUN Tebedu ba tuju mai pemansang ngagai sitak DUN nya. -EDISI UKAS

add comment