Menteri Perengka Pengangkut Sarawak Nerima Penemuai Basa Duta Besai Belgium

HARI DUA, 25 JANUARI 2022

KUCHING: Menteri Perengka Pengangkut Sarawak, Dato’ Sri Lee Kim Shin nerima penemuai basa ari Duta Besai Belgium ke Malaysia, H.E Pascal Gregoire di Bangunan Baitul Makmur.

Tuju penemuai tu iya nya dikena merambu kuing dudi hari pemansang enggau kerejasama kaul entara Belgium enggau Sarawak kelebih agi ba pekara ngintu sungai, perengka pengangkut hidrogen, atur trafik mengeri enggau ke bukai.

Berebak enggau nya, Pascal madah, tu ketiga kali iya udah nemuai ngagai Sarawak betemu enggau Menteri Perengka Pengangkut Sarawak betukar buah penemu awakka ulih mandangka pengelebih nengeri Sarawak di Belgium enggau Eropah.

“Mayuh macham awak ke bisi di Sarawak ungkup sektor dagang, betukar raban nembiak universiti enggau ke bukai lalu tu jam ke engkeman kitai diau ba ditu,” ku iya bejaku maya dirandau pemberita Unit Komunikasi Awam Sarawak (UKAS) sepengudah tembu penemuai basa iya di Opis Menteri Perengka Pengangkut Sarawak kena Hari Satu tu tadi.

Kelimpah ari nya, Pascal madahka kenyau 7 Januari tu tadi, raban iya begulai enggau Unit Perancang Ekonomi Sarawak enggau Dewan Perniagaan Luxembourg, Belgium sereta Dewan Perniagaan Eropah ngatur Webinar di Kuala Lumpur.

Iya madahka urung 100 iku orang dagang ari Eropah enggau Kompeni Belgium bepalan di Malaysia ngambi bagi ba program tu seririh enggau tuju penumbuh Pelin Pemansang Udah COVID-19 (PCDS) baka ke udah dipadah Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Nerang enggau silik, H.E Pascal madahka program nya dikena nambahka penemu enggau silik nundaka peminta teknologi Belgium. -EDISI UKAS

add comment