GPS Ngamatka Semaya, Bejadi BKSS 8.0 Enda Lama Agi

HARI TIGA, 26 JANUARI 2022

KUCHING: Perintah Sarawak deka bejadika pakej Bantu Khas Sarawakku Sayang 8.0 (BKSS 8.0) baka ke udah disemaya sebedau tu dikena nyaup ngelempungka tating belanja rayat ketegal pandemik COVID-19 ti mengkang agi nyadi.

Kepala Menteri Sarawak, Datuk Patinggi Tan Sri Dr Abang Abdul Rahman Zohari Tun Datuk Abang Openg madah, BKSS serak tu diungkupka enggau agih RM285.47 juta, bantu diberi enggau chara ukai mata duit dalam kandang enam bulan keterubah taun 2022.

“Belanja nya siti ari belanja ti pemadu besai ari nengeri  tu enda nyengkaum belanja khas lebih RM91 juta ngagai Komiti Penyangga Penusah Nengeri Sarawak (JPBNS) kena nampung belanja maya betapi enggau pengelekai COVID-19 di nengeri tu,” ku iya bejaku maya bejadika Hari Kereja Perintah Sarawak 2022 (HPA22) ba Palan Konvensyen Borneo Kuching (BCCK), kena Hari Dua tu tadi.

Nambahka jaku iya, Kepala Menteri madah, perintah Sarawak dipegai Gabungan Parti Sarawak (GPS), perintah ti ngamatka semaya baka ke dibantai ba manifesto GPS.

Ba rikod, sepemanjai taun 2020 enggau 2021, perintah udah bejadika tujuh pakej bantu ngagai rayat, iya nya BKSS 1.0 nyentuk BKSS 7.0 sereta 30 bengkah program diagih nengah belanja sepenyampau RM5.30 bilion.

Bela bisi maya nya, Sapit Kepala Menteri, Datuk Amar Douglas Uggah Embas enggau Dato Sri Prof Dr. Sim Kui Hian, Speaker DUN Sarawak, Tan Sri Datuk Amar Mohamad Asfia Awang Nassar, Sekretari Perintah Sarawak, Datuk Amar Jaul Samion, Sekretari Perintah Besai Sarawak, Dato’ Amir Omar enggau Chairman Komiti Servis Perintah Nengeri Sarawak, Datu Abdul Ghafur Shariff. -EDISI UKAS

add comment