Perintah Sarawak Masa, Beterima Kasih Ngagai Pengeransing Gawa Orang Kereja Perintah Maya Pandemik

HARI TIGA, 26 JANUARI 2022

KUCHING: Sekretari Perintah Nengeri Sarawak, Datuk Amar Jaul Samion madahka servis kereja perintah Sarawak udah ngasaika ubah besai ba pekara nentuka semua tuju, program enggau projek perintah datai ba rayat.

Ku iya, perintah sarawak benasit ketegal penegap kaul pengawa kereja perintah enggau pegai politik ke nyadi pelasar ngagai pengawa bejadika peminta rayat.

“Kami chukup betuah laban ngembuan kaul ti manah entara servis perintah Sarawak enggau tuai politik laban nya endang pekara pemun nentuka peminta rayat ti suah berubah.

“Ari kaul tu kitai ulih negapka diri ngerebut awak ke bisi kena kitai nirika baru Sarawak nengah Pelin Pemansang Menua Udah COVID-19 (PCDS) 2030,” ku iya bejaku munyi nya maya ba program Hari Perkhidmatan Awam Negeri Sarawak di Pusat Konvensyen Borneo Kuching (BCCK) kena Hari Dua.

Datuk Amar Jaul mega madah, pemujur bejalaika pengawa kereja perintah beguna bendar ngagai Sarawak mengkang mansang ngelawa ekonomi enggau tikas penatai pemisi tinggi manggai taun 2030.

“Servis Perintah Nengeri (SCS) mesti nyikap diri nentuka peminta rayat ti majak nambah lebuh meri servis ke pemaik rayat,” ku iya nerang.

Kelimpah ari nya, iya madah, perintah Sarawak udah bekenaka chara baru ngemujurka servis Sistem Integrated Service Management (ISM). -EDISI UKAS

add comment