RM76 Juta Dikena Ngaga Jalai, Ngemansangka Gedong

HARI TIGA, 26 JANUARI 2022

KUCHING: Perintah Sarawak nengah pegai Gabungan Parti Sarawak (GPS) udah ngungkupka agih belanja RM76 juta dikena ngaga jalai ari Ulu Gedong ke Gedong.

Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pekara nya sebagi ari pengeransing perintah mai pemansang lebih agi menua ulu di Gedong.

Ku iya, siti ari pengeransing tu iya nya ngaga jalai alun.

“Tu nyengkaum jalai ari Semalatong iya nya di Ulu Gedong ke deka digaga kitai ngelawa Gedong. Tu deka ngemuntangka penyauh pejalai alai belanja RM76 juta udah diungkupka ngaga projek tu,” pia ku iya madah maya Pengerami Apresiasyen N.26 Gedong di Kuching, kena Hari Dua.

Nambahka jaku iya, Kepala Menteri mega madah, RM30 juta bela diungkupka dikena ngaga entali di Lubok Punggor ba tuju ngemansangka menua nya.

Ku iya, projek nya deka nyadi pemun pemansang Lubuk Punggor ba sektor betanam betupi di Sarawak.

Pengerami nya bela digulu bini iya, Puan Sri Datuk Amar Juma’ani Tun Tuanku Bujang, Menteri Dagang Temuai, Seni enggau Main Asal Malaysia, Dato Sri Nancy Shukri, Menteri Muda Infrastruktur enggau Pemansang Penyangkai Kapal-Pemansang Infrastruktur, Ir Aidel Lariwoo enggau Sapit Sekretari Perintah Nengeri Sarawak (Transformasyen Sosio Ekonomi), Dato Sri Mohamad Abu Bakar Marzuki, Kaban Kunsil Nengeri (ADUN) Simunjan, Awla Dris enggau chairman komiti pengerami Datuk Mohd Naroden Majais. -EDISI UKAS

add comment