Dato’ Sri Huang Meri RM1 Juta Ari Belanja Iya Empu Ngagai 34 Sekula DUN Repok

HARI EMPAT, 27 JANUARI 2022

SARIKEI: Kaban Kunsil Nengeri (ADUN) Repok, Dato’ Sri Huang Tiong Sii udah meri RM1 juta ngagai 34 buah sekula primeri enggau sekula sekondri ba sitak DUN Repok.

Iya nyuaka chek pemeri nya ba sebengkah pengerami ke diatur di Sarikei, kena Hari Dua tu tadi.

Dato’ Sri Huang madah, pemeri ari iya empu nya dikena iya nyukung program ninting taun sekula kelimpah nyaup ngelempungka tating belanja apai indai nyengulaka anak sida.

“Ngelama tu semua kitai nemu aku endang ngemeratka pekara belajar.

“Kenyau ari aku nyadi pengari rayat ari taun 2016 aku naka alah ninting taun bepintaka belanja ari Projek Transformasyen Menua Pesisir (RTP) dikena ngemanahka perengka guna sekula,” pia ku iya madah.

Nambahka jaku iya, Dato’ Sri Huang madah, kelimpah ari nya iya mega meri bantu bukai baka ngepan sekula, kasut enggau beg ngagai semua nembiak ba Repok enda ngira bansa tauka jalai pengarap kenyau ari taun 2019.

Ba pengerami nya, iya mega bisi nyuaka chek RM100,000 ngagai Tadika Sze Hua dikena nyaup ngemujurka program sekula. -EDISI UKAS

add comment