HARI ENAM, 29 JANUARI 2022
KUCHING: Pemidang Ex-Tuai Megai Menua Sarawak, Niang Tun Pehin Sri Abang Muhammad Salahuddin Abang Barieng pengelenyau besai ngagai nengeri tu.
Kepala Menteri Sarawak, Datuk Patinggi Tan Sri Dr Abang Abdul Rahman Zohari Tun Datuk Abang Openg madah, niang siku orang ti udah mai pemujur kelimpah negika hak enggau kuasa nengeri Sarawak.
Ku iya, niang mega siku orang ti ransing bejalaika pengawa maya menua malaysia ditumbuhka lalu siku tuai ke udah kala dirandau Komiti Cobbold kelia ngujungka menua kitai merdeka nyentukka saharitu.
“Tun udah kala dichiri nyadi YDP 2 kali. Tu mandangka niang siku orang ti ransing megai pengawa kelimpah nyatupka kaul pupu raban bansa di Sarawak,” ku iya madah munyi nya lebuh dirandau pemberita maya datai meri basa kepenudi di Masjid Jamek Kuching, kena Hari Enam.
Niang Tun Pehin Sri Abang Muhammad Salahuddin ke beumur 100 taun midang ba Palan Perubat Normah Kuching kena Hari Lima tu tadi.
Niang diada kena 27 Ogos 1921 di Kampung Nangka, Sibu, nyadi Tuai Megai Menua Nengeri Sarawak ti keterubah kala megai penuduk nya dua kali.
Pia mega, niang keterubah nyadi Tuai Megai Menua Nengeri Sarawak Ke-3 kena 2 April 1977 nyentuk 2 April 1981 lalu dichiri megai penuduk nya nyadi Tuai Megai Menua Nengeri Sarawak Ke-6 ari 22 Februari 2021 nyentuk 28 Februari 2014.
Sama bisi datai meri basa kepenudi iya nya Tuai Megai Menua Yang Di-Pertua Negeri Sarawak, Tun Pehin Sri Abdul Taib Mahmud enggau bini iya Toh Puan Datuk Patinggi Raghad Kurdi Taib sereta bala pemesai ke bukai.
Sebedau tu bini iya, niang Toh Puan Hajah Norkiah Bagong midang kena 14 April 2021 ba Sepital Besai Sarawak ketegal strok ba pala lalu bini dulu iya niang Dayang Umi Khalthum mega udah lama midang.
Niang bisi semilan iku anak, empat anak iru, 25 uchu enggau 26 ichit.
Lemai tu tadi niang udah dianjung ngagai Pendam Raban Islam Samariang.-EDISI UKAS
