HARI MINGGU, 30 JANUARI 2022
KUCHING: Sitak Kunsil Nengeri (DUN) Satok deka terus dikemansang ke pemaik mensia mayuh ba Mengeri Kuching.
Kepala Menteri, Datuk Patinggi Tan Sri Dr Abang Abdul Rahman Zohari Tun Datuk Abang Openg madah, projek ngaga jalai alun baru deka ngemuntangka Segedup enggau Maong nuju terus ngagai Satok ti diberi nama Jalan Tan Sri Datuk Sulaiman nyema udah tembu ila.
“Sitak Kunsil DUN Satok diatu ukai baka ke suba, laban diatu Satok nyadi ‘Urban Centre’ ngagai raban bansa Melayu disukung raban bansa Cina enggau Iban mai pemansang ba Satok.
Iya bejaku munyi nya ba Program Meri Selamat Enggau Apresiasyen Pengawa Bepilih Besai Nengeri Ke-12 (PRN12) DUN N8 Satok di Hotel Pullman, Kuching, Hari Enam.
Ngelansa pekara ke sebaka, Kepala Menteri Datuk Patinggi Tan Sri Abang Zohari madah, perintah Sarawak deka numbuhka sebuah palan genturung pendiau baru iya nya Skim Berumah ba Segedup enggau Maong.
“Nya alai, kitai deka numbuhka Skim Berumah Baru ba Segedup enggau Maong sepengudah projek jalan alun tu tembu ila lalu ngemuntang terus ngagai sitak Satok,” ku iya nerang.
Ku iya, belanja projek nya udah dikemendar Perintah Sarawak nengah Projek Skim Berumah ari baruh Opis Tanah Enggau Survei (JTS) mungkur ngaga 600 unit buah rumah baru.
Pia mega, pemanah rampa menua Mengeri Kuching deka dikemanahka agi awakka ulih matak temuai bukai datai ngagai nengeri tu.-EDISI UKAS
