Bala Tuai Di Sarawak Ngerami Rumah Tebuka Taun Baru China SUPP Nengah ‘On-Line’

HARI TIGA, 2 FEBRUARI 2022

KUCHING: Pengerami Rumah Tebuka Taun Baru China Parti Sa’ati Rayat Sarawak (SUPP) tetap rami tajapan disambut nengah chara ‘on-line’.

Menteri Dagang Temuai, Seni Enggau Main Asal Malaysia (MOTAC), Dato’ Sri Nancy Shukri ke mega Kaban Parlimen Batang Sadong bela ngambi bagi ba pengerami nya ba rumah iya di Petra Jaya, kena Hari Dua tu tadi. 

Pengerami nya bela digulu Menteri Muda Pemansang Infrastruktur enggau Penyangkai Kapal 1, Ir Aidel Lariwoo ke mega Kaban Kunsil Nengeri (ADUN) Sadong Jaya, Kaban Parlimen Batang Lupar, Dato’ Sri Rohani Karim, Kaban Parlimen Kota Samarahan, Rubiah Wang enggau ADUN Simunjan, Awla Dris.

Pengerami nya dipenyadika Kepala Menteri Sarawak, Datuk Patinggi Tan Sri Dr Abang Abdul Rahman Zohari Tun Datuk Abang Openg enggau bini iya, Puan Sri Datuk Amar Jumaani Tun Tuanku Bujang sereta bejadika kelai pengawa ‘yeesang’ nitihka adat raban bansa China nandaka pengelantang enggau pemujur dalam pengidup.

Pengerami nya mega bela digulu Presiden SUPP ke mega Sapit Kepala Menteri, Dato Sri Prof. Dr Sim Kui Hian.

Dato’ Sri  Nancy nyukung jaku padah ari kepala menteri madahka pengawa raban bansa China ba sektor ekonomi ulih nyungkakka penatai pemisi nengeri, sereta kerejasama ari pupu raban bansa deka terus ditandu ke pemaik enggau pengelantang pengidup rayat di Sarawak.-EDISI UKAS

add comment