Kerejasama Rayat Nyaup Sarawak Napi Pandemik COVID-19

HARI EMPAT, 3 FEBRUARI 2022

MIRI: Kerejasama rayat sarawak napi pandemik COVID-19 udah mayuh nyaup nengeri tu mutar penanggul ketegal penyakit nya.

Sapit Kepala Menteri ke mega Presiden Parti Sa’Ati Rayat Sarawak (SUPP), Dato’ Sri Dr Sim Kui Hian madah, tu nyengala dipeda ari penyampau kes nabanka nyawa di sarawak kurang enti dibanding enggau nengeri bukai kelimpah penyampau ke udah betuchuk vaksin mega majak nambah.

“Dua taun tu tadi, pandemik COVID-19 balat amat ngeruga pengelikun kitai lalu mai penanggul ke besai ngagai semua.

“Terima kasih laban ari saup kita, penyampau kes nabanka nyawa di Sarawak maya tu kurang enti dibanding enggau penyampau serata menua.

“Kitai mega ngerikod penyampau ke udah betuchuk vaksin pemadu mayuh.

“Semua tu bepun ari ulah beserakup rayat Sarawak ngelaban pengelekai penyakit tu,” pia ku iya madah.

Iya bejaku munyi nya maya pengerami rumah tebuka Taun Baru China 2022 nengah aplikasyen zoom, kena Hari Tiga.

Bekaul enggau pengerami ke diatur SUPP Miri-Sibuti Parliamentary Liaison Committee nya, Dato’ Sri Dr Sim madah, iya berasai temegah ati enggau pengerami ke diatur komiti nya.

Kelimpah ari nya iya madah, pandemik COVID-19 enda nekul rayat Sarawak nyambut pengerami Taun Baru China taja enda diintu baka selama.

Bela ngulu pengerami tu iya nya Menteri Perengka Pengangkut Sarawak ke mega Kaban Kunsil Nengeri (ADUN) Senadin, Dato Sri Lee Kim Shin, Menteri Muda Dagang Temuai, Industri Kreatif enggau Seni Pemerindang I ke mega ADUN Piasau Datuk Sebastian Ting Chiew Yew enggau Datuk Bandar Miri ke mega ADUN Pujut, Adam Yii Siew Sang.-EDISI UKAS

add comment