Program Imunisasyen COVID-19 Nembiak (PICKIDS) Sarawak Berengkah 5 Februari Tu

HARI EMPAT, 3 FEBRUARI 2022

KUCHING: Program Imunisasyen COVID-19 Nembiak (PICKIDS) Sarawak ungkup nembiak umur lima ngagai 12 taun deka berengkah diatur 5 Februari tu.

Sapit Kepala Menteri ke mega Chairman Komiti Penyangga Penusah Nengeri Sarawak (JPBNS), Datuk Amar Douglas Uggah Embas madah, ba program nya nembiak deka betuchuk vaksin bansa Pfizer-Biontech.

Bejaku ba aum media udah ke ngabas Sepital Besai Sarawak (HUS) sehari tu tadi, iya mega madah, bisi 272,500 nembiak di Sarawak tau betuchuk vaksin.

“Berengkah 5 Februari tu, nembiak ke besekula deka betuchuk vaksin ba sekula sida tauka ba palan meri vaksin (PPV) baka ke udah dilanggur nitihka Opis Pengerai Sitak ba menua diri empu,” pia ku iya madah.

Dulu ari nya iya ngemataka 30 iku nembiak ke bisi komorbid di HUS betuchuk vaksin bansa pfizer nengah PICKIDS Sarawak.

Nerang enggau nyemetak, iya madah, nembiak ke bisi penanggul ba pengerai deka dulu agi diberi vaksin ketegal sida mudah dirampit Covid-19.

Nambahka jaku iya, iya ngelalau bala apai indai ngambika enda nangi laban timpuh pengawa meri vaksin digaga di sekula alai iya ngarapka sida tau betanya ngagai sekula nyema deka nemu kemaya anak sida betuchuk vaksin.

Ba aum media nya mega, Sapit Kepala Menteri ke mega Menteri Pengerai Mensia Mayuh, Pengawa Berumah Enggau Perintah Kandang Menua, Dato’ Sri Dr Sim Kui Hian madah, nembiak mesti diberi vaksin laban nya deka nyaga sida ari Multisystem Inflammatory System (MIS-C) enggau penanggul ketegal COVID-19.

“Ketegal nya aku minta semua apai indai besaup enggau KKM ngambika anak sida bela likun baikka maya ukai ba rumah tauka ba sekula sereta ngurangka penau ngerampit nembiak bukai,” ku iya nerang.

Ba pekara bekaul, naka 2 Februari tu tadi bisi 2,135,128 iku tauka 75.8 peratus rayat Sarawak udah betuchuk vaksin dos kedua lalu penyampau dos ‘booster’ udah diberi iya nya 83.3 peratus.-EDISI UKAS

add comment