HARI LIMA, 4 FEBRUARI 2022
KAPIT: Pengawa ngelumbung niang Sapit Kepala Menteri, Tan Sri Datuk Amar (Dr) James Jemut Masing udah diatur ba rumah iya di Bukit Goram, Kapit kena Hari Tiga tu tadi.
Adat tu pengawa kepenudi dikena meri basa ngagai niang.
Bala ke datai bela meda video pandak sentang jalai cherita pengidup niang.
Pengawa nya digulu Menteri Dagang Dalam Nengeri enggau Pekara Bebeli Barang ke mega Kaban Parlimen Kapit, Dato’ Sri Alexander Nanta Linggi, Menteri ba Opis Kepala Menteri ke mega Kaban Kunsil Nengeri (ADUN) Kakus, Datuk John Sikie Tayai, Menteri Muda Pemansang Infrastruktur enggau Penyangkai Kapal ti mega ADUN Samalaju, Majang Renggi enggau Kaban Parlimen Ulu Rajang, Datuk Wilson Ugak Kumbong.
Bala ADUN ke bukai ti bela bisi datai iya nya ADUN Ngemah, Anyi Jana, ADUN Murum, Kennedy Chuk Pai, ADUN Belaga, Datuk Liwan Lagang, ADUN Balai Ringin, Datuk Snowdan Lawan sereta bala temuai dipebasa ke bukai.
Kelimpah ari nya, adat ke sebaka bela diatur ungkup niang apai enggau indai ADUN Baleh, Nicholas Kudi di kediaman beliau di Jalai Selirik, Kapit.
Pengawa nya digulu bala temuai ke dipebasa enggau bala kaban belayan ke semak. -EDISI UKAS
