Kepala Menteri Sarawak Datai Meri Basa Kepenudi Ngagai Niang Tan Sri Abang Khalid

HARI ENAM, 5 FEBRUARI 2022

KUCHING: Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg datai meri basa kepenudi ngagai niang Tan Sri Abang Khalid Tan Sri Datuk Amar Abang Marzuki ti udah midang kena Hari Lima.

Niang Tan Sri Abang Khalid iya nya Presiden Gerempung Pengimport Enggau Pedagang Perengka Pengangkut Melayu Malaysia (PEKEMA) Sarawak berumur 74 taun midang jam 5:43 ba Sepital Bangsar, Kuala Lumpur ketegal sakit riman.

Maya datai, Datuk Patinggi Tan Sri Abang Zohari betemu enggau diri sebilik niang kelimpah bejalaika pengawa besembiang sebedau niang Tan Sri Abang Khalid dianjung ngagai Pendam Melayu ba Samariang.

Ngelansa pengawa niang maya agi idup suba, niang siku orang ti aktif ba pekara politik enggau lumba kelimpah nyadi Sapit Tuai Pampang PBB Semariang sereta mangku pengawa nyadi Presiden Gerempung Sepak Takraw Sarawak.

Niang ninggalka siku balu, Puan Sri Lily Johari, lapan iku ucu enggau tujuh iku anak nyengkaum siku artis pemerindang iya nya Camelia  tauka nama amai iya Dayang Noor Camelia.-EDISI UKAS 

add comment