HARI ENAM, 5 FEBRUARI 2022
MIRI: Pengerami Taun Baru China Taun 2022 sekali agi disambut raban bansa China di Sarawak enggau ati gaga.
Menteri Muda Nembiak, Lumba enggau Pemansang Dagang 2 ke mega Kaban Kunsil Nengeri (ADUN) Lambir, Dr Ripin Lamat madah, taja pan pia ketegal diatu menua agi betapi enggau pengelekai pendemik COVID-19, mensia mayuh ditangkan anang enda ngemeranka Atur Pengawa Standard (SOP) ti udah ditetapka.
“Baka taun tu, taja kitai agi nitihka SOP COVID-19 tang kitai udah ngalih ngagai renggat 4 Pelin Nyuman Menua (PPN). Nyadi atur tu tadi ngulihka kitai nyambut pengerami Taun Baru China rami agi ari dua taun ke udah,” ku iya madah.
Iya bejaku munyi nya ba program Taun Baru China diatur Gerempung Raban Pengarap Dewa Wong Lao Xian’ Miri di Dewan Wong Lao Xian Miri, kena Hari Lima tu tadi.
Dr Ripin madah, pengerami tu mega bela disambut bansa bukai lalu tu mandangka penyerakup ke dikembuan pupu raban bansa ba nengeri tu.
Ba pengawa ke sebaka, Dr Ripin meri agih belanja RM150,000 nengah geran Projek Mit Menua Pesisir (MRP) dikena ngemanah tokong kelimpah belanja RM10,000 dikena nyaup ngemujurka pengawa ba tokong.
Sama bisi datai Chairman SUPP Lambir, Lee Thin Hin enggau Chairman Gerempung Raban Pengarap Dewa Wong Lao Xian Miri, Nicholas Lai Chun Wei. -EDISI UKAS
