Sungkak Penyedar Kes Nabanka Nyawa Ketegal Sakit Riman

HARI ENAM, 5 FEBRUARI 2022

KUCHING: Dikena Ngingat ‘Hari Kanser Sedunia’ 2022 ti disambut kena 4 Februari, Gerempung Advokasyen Enggau Penyedar Riman, Kuching (SCAN) enggau kerejasama raban urusetia Kunsil Nengeri (DUN) Sarawak ngidupka lampu di Begunan DUN.

Menteri Pemansang Orang Indu, Nembiak Mit Enggau Pemansang Pengelantang Raban Bansa Sarawak, Dato’ Sri Fatimah Abdullah madah, program ninting taun tu ulih nyungkakka penyedar ngagai mensia mayuh kelimpah meri penemu bekaul enggau penyakit riman ti majak nambah nabanka nyawa diatu.

“Aku berasai lantang ati laban bisi Gerempung Ukai Dikuasa Perintah (NGO) ti chakah ngulu program baka malam tu ngambika kitai sama begempung meri penerang ngagai mensia mayuh sentang penyakit riman tu.

“Bisi mega raban tim perubat ukai semina ba NGO, tang mega sida nya orang ti megai tanggungpengawa ngintu sereta ngubat orang sakit riman,” ku iya madah.

Iya bejaku munyi nya ba program Hari Kanser Sedunia 2022 kena Hari Lima empai lama tu tadi.

Berebak enggau nya, video muzik Hari Kanser Sedunia ti berambaika leka jaku “close the care gap” dipandangka maya nya ambikka mensia mayuh nemu nama pemedis ke ditapi sida ke sakit riman.

Pia mega, SCAN udah ngatur program “give your locks, give them hope”, sereta bejadika bup malin disalin ngena Jaku Iban berambaika jaku “Nuan Bisi Riman? Nama Patut Utai Dikereja Nuan: Malin Orang Sakit”. -EDISI UKAS

add comment