HARI SATU, 7 FEBRUARI 2022

KUCHING: Taiyo Yudin merambu deka meranakka puku enggau penyampau RM4.1 bilion ba tanah 70 ekar pemesai di Sama Jaya.

Sapit Kepala Menteri Sarawak, Datuk Amar Awang Tengah Ali Hasan madah, pengawa ngaga renggat keterubah udah berengkah taun siti tadi lalu disadang tembu taun 2023.

“Kompeni tu dipelabaka deka ngambi 2,000 iku pengereja pengawa agi ba pengawa renggat keterubah.

“Naka ke diatu, kompeni nya bisi 5,300 iku pengereja pengawa alai 98 peratus ari penyampau nya peranak menua tu empu,” pia ku iya madah nengah penerang media, kena Hari Enam tu tadi.

Dulu ari nya iya nerima penemuai basa ari Direktor Pengatur enggau Tuai Pegawai Eksekutif (CEO) Taiyo Yuden (Sarawak) Sdn. Bhd Yoshio Akimoto ba opis iya di Wisma Sumber Alam.

Nambahka jaku iya, Datuk Amar Awang Tengah ke mega Menteri Dagang Entarabansa, Industri enggau Pemeranak Puku ngenataika jaku terima kasih ngagai Taiyo Yuden ti pechaya pegai Perintah Sarawak.

Kelimpah ari nya, iya besemaya ngagai Taiyo Yuden alai Perintah Sarawak deka nyaup meri bantu dikena nentuka projek sida tembu nitihka timpuh enggau langgur.

Pengawa sehari nya bela dikemata Menteri Muda Dagang Entarabansa, Industri enggau Pemeranak Puku, Datuk Malcolm Mussen Lamoh. -EDISI UKAS