HARI SATU, 14 FEBRUARI 2022
KUCHING: Aum keterubah ungkup penggal keterubah Kunsil Nengeri Sarawak (DUN) Ke-19 diatur belabuh sehari tu nyentuk 16 Februari 2022.
Ba aum tu, lima Rang Undang-Undang (RUU) deka dipejurai iya nya RUU Perbekalan Tambahan (2021), 2022; RUU (Ubah) Konstitusyen Nengeri Sarawak 2022; RUU Tafsiran (Ubah) 2022; RUU Opis Pemansang Sagu Enggau Apung, 2022 Enggau RUU Opis Industri Getah Sarawak 2022.
RUU Perbekalan Tambahan (2021), 2022 deka dibantaika Sapit Kepala Menteri Datuk Amar Douglas Uggah Embas, RUU (ubah) Konstitusyen Nengeri Sarawak 2022 dibantika Menteri Raban Nembiak, Lumba Enggau Pemansang Orang Dagang, Dato Sri Abdul Karim Rahman Hamzah lalu RUU Tafsiran (ubah) 2022 dibantaika Menteri Muda ba Opis Kepala Menteri (Undang-Undang, Ma63 Enggau Kaul Nengeri Perintah Besai), Datuk Sharifah Hasidah Sayeed Aman Ghazali.
Dua iti agi RUU iya nya RUU Opis Pemansang Sagu Enggau Apung, 2022 enggau RUU Opis Industri Getah Sarawak 2022 dibantaika Menteri Pengawa Betanam Betupi Moden enggau Pemansang Kandang Menua, Dato Sri Dr Stephen Rundi Utom.
Aum kunsil serak tu mega diatur enggau nadai pengawa bejadi ari Tuai Megai Menua (TYT) Tun Pehin Sri Abdul Taib Mahmud.
kelimpah ari nya, pengawa tanya saut enggau simpul ari menteri bela enda diatur serak tu. -EDISI UKAS
