HARI DUA, 15 FEBRUARI 2022

KUCHING: Aum Keterubah Penggal Ke-19 ba Hari Kedua, kena Hari Dua, bejuraika tiga Rang Undang-Undang (RUU).

Speaker Kunsil Nengeri (DUN) Sarawak, Tan Sri Datuk Amar Mohamad Asfia Awang Nassar madah, tiga Rang Undang-Undang tu iya nya RUU Perbekalan Tambahan (2021) 2022, RUU (Ubah) Konstistusyen Nengeri Sarawak enggau RUU Tafsiran (Ubah) 2022.

Pekara bekaul enggau RUU (Ubah) Konstitusyen Nengeri Sarawak ba aum seharitu tu sigi endang disadang alai dipejuraika Menteri Dagang Temuai, Industri Kreatif enggau Seni Pemerindang Sarawak, Dato’ Sri Abdul Karim Rahman Hamzah ba bacha keterubah, kedua enggau ketiga.

Ba RUU (Ubah) Konstitusyen Nengeri Sarawak tu deka mandangka ubah Pekara 6(3) ba ganti nama ‘Kepala Menteri’ ngagai ‘Perdana’.

Kelimpah ari nya, tuju RUU tu mega dikena ngaduka Pekara 7A ba pengawa nganti nama ‘Menteri Muda’ ngagai ‘Sapit Menteri’.

Udah nya, RUU Tafsiran (Ubah) diteruska Menteri Muda Ba Opis Kepala Menteri (Undang-Undang, MA63 enggau Kaul Sarawak-Perintah Besai), Datuk Sharifah Hasidah Sayeed Aman Ghazali ba bacha keterubah, kedua enggau ketiga.

RUU Perbekalan Tambahan (2021) 2022 dibantaika Sapit Kepala Menteri, Datuk Amar Douglas Uggah Embas lalu RUU Opis Pemansang Sagu enggau Apung sereta RUU Opis Industri Getah deka dibantaika Menteri Pengawa Betanam Betupi Moden enggau Pemansang Kandang Menua Sarawak, Dato’ Sri Dr Stephen Rundi Utom, kena Hari Tiga.-EDISI UKAS