HARI EMPAT, 17 FEBRUARI 2022
KUCHING: Lima Rang Undang-Undang (RUU) (Ubah) ke udah dikemendarka ba Aum Keterubah Ungkup Penggal Keterubah Kunsil Nengeri (DUN) Sarawak ke-19 nyengala mandangka pengeransing Gabungan Parti Sarawak (GPS) nyungkakka sosioekonomi Sarawak.
Menteri Muda Nembiak Enggau Lumba ke mega Tuai Pemuda Parti Pesaka Bumiputera Bersatu (PBB), Datuk Gerald Rentap Jabu madah, perintah GPS nyaup rayat nempa awak ba sesebengkah industri kelimpah ngatur chara baru ba pemansang industri di nengeri tu.
“Kitai beratika menua pesisir endang udah bisi atur lalu udah ditumbuhka gerempung khas nyaup nyungkakka ekonomi Sarawak,” ku iya madah ba aum media ba hari kepenudi Kunsil Nengeri (DUN) Sarawak ke-19, kena Hari Tiga.
Gerald ke mega Kaban Kunsil Nengeri (ADUN) Layar bela mantah jaku ADUN Bawang Assan, Wong Soon Koh ti madahka penyampau nembiak menua pesisir ba industri sagu enggau nipah sereta pengawa betanam betupi majak kurang.
“Nya ukai pekara ke bendar, laban mayuh nembiak ulih bekenaka chara baru enggau mujur kelimpah fertigasyen enggau ke bukai alai tu sebagi ari chara Opis Menteri Nembiak, Lumba enggau Pemansang Orang Dagang semampai nentuka semua tikas umur nitihka polisi enggau dasar perintah,” ku iya.
Berebak enggau nya, ADUN Tupong, Fazzrudin Abdul Rahman mega nyakal penemu raban penyakal bekaul enggau pemutus ngubah RUU Konstitusyen Nengeri 2022 dikena nyilih gela Kepala Menteri ngagai ‘Premier’ nadai ngembuan pengelebih.
Ku iya, Sarawak enda sebaka agi enggau Melaka tauka Pulau Pinang lalu kitai deka mulaika pekara ke betul udah ubah konstitusyen dikemendarka.
Iya ke mega Sapit Tuai Pemuda PBB nambahka jaku iya, mayuh agi inisiatif enggau atur pengawa deka digaga dikena nentuka Sarawak ngambi baru hak nitihka pekara ke udah disemaya ba Sempekat Malaysia 1963 (MA63).
“Kitai enda ngetu ba ditu aja alai mayuh agi chara deka diatur dikena nentuka hak kitai dipulaika baru.
“Pekara tu dikemerat ngambika rayat meretika kebuah gela Kepala Menteri kitai ditukar ngagai Premier Sarawak,” ku iya madah.– EDISI UKAS
