HARI EMPAT, 17 FEBRUARI 2022

KUCHING: Pengawa numbuhka Rang Undang-Undang (RUU) Opis Industri Getah Sarawak (SARIB) mandangka pengeransing Sarawak deka nyaup orang bekebun getah.

Kaban Kunsil Nengeri (ADUN) Meluan, Rolland Duat Jubin ti bela nyukung RUU nya mega madah, industri getah di Sarawak agi enda ulih mulaika penatai tauka penguntung ke manah enti dibanding enggau kelapa sawit enggau lada.

Nya alai, nengah SARIB, iya minta kebun getah ke dipegai Skim Pemansang Tanah, Opis Pemansang Tanah Sarawak (SLDB) diperati baru nengah pengawa ngaga Skim Pajak ba kandang menua ke endang udah bisi baka di Pakan enggau Entulang ti tau alai ngepunka pengawa nya.

Kebuah pia ku iya, udah maya iya Sarawak bisi autonomi diri empu ba komoditi getah.

“Aku minta kitai berati baru endur ke udah bisi tu. Ari penyampau tu, berapa ekar getah agi idup lalu berapa pemayuh sida ke agi nangkal?

“kitai enda ulih semina ngaga langgur deka nanam getah. Nama guna enti nanam beribu ekar tang enda ditangkal?

“Nya alai, lakka kompeni luar ngaduka kandang menua ke bedau ngambika ulih nyaup nambahka asil dulu,” pia ku iya madah maya bejuraika RUU SARIB ba hari ketiga Aum Keterubah Ungkup Penggal Keterubah Kunsil Nengeri (DUN) Sarawak Ke-19, kena Hari Tiga.

Kelimpah ari nya, Rolland nyemetak minta SARIB matau sida ke meli getah lalu netapka rega getah nitihka rega ke bendar.

“Enti sida ke meli getah enggai meri kerejasama, ba aku kitai patut minta baru Gerempung Peladang Menua (PPK) di serata Sarawak meli getah enggau rega ke manah,” ku iya madah baru.

Berindik ari nya, iya madah, ketegal ke nyadi pengari rayat, iya deka meda SARIB semampai betatika pengelantang orang nangkal getah lalu enda semina nitihka jaku orang ke meli getah. -EDISI UKAS