Pengawa Ngaga Jalai Raya, Sambung Jalai Seput Pemansang Sarawak

HARI ENAM, 19 FEBRUARI 2022

BINTULU: Pengawa ngaga jalai raya enggau sambung jalai beguna amat ba Sarawak dikena ngenegap enggau nyadi seput pemansang sosioekonomi sereta infrastruktur.

Kenu ku Kepala Menteri Datuk Patinggi Tan Sri (Dr) Abang Abdul Rahman Zohari Tun Datuk Abang Openg, tu deka nyadi penyungkak dikena nyapai juluk nyadi nengeri maju ba taun 2030.

“Projek ngaga enggau muka jalai besai ba nengeri tu nyadi batang pekara ti beguna bendar kelimpah mai pemansang, nyungkak ekonomi sereta infrastruktur Sarawak manggai taun 2030 ila.

Iya madah munyi nya maya bejadika Pengawa Muka Jalai Raya Pan Borneo Sarawak, Arung Seksyen Nyabau Pakej Kereja 10 (WPC 10) di Bintulu, kena Hari Enam.

Kepala Menteri madah, polisi Perintah Gabungan Parti Sarawak (GPS) ke jauh timpai ulih ngangkatka pemansang ekonomi ngagai tikas ke lebih tinggi.

Ku iya, perambu strategik nya deka meri perati ngagai pekara infrastruktur enggau internet.

“Perintah GPS udah merambu deka mai pemansang ekonomi ti strategik sereta ngemeratka pemansang infrastruktur nyengkaum pekara infrastruktur internet kelimpah ngaga jalai nuju genturung pendiau.

“Aku mega pechaya nengah dasar tu mega kitai ulih ngemansangka ekonomi nengeri tu ngagai tikas ke tinggi agi kelimpah nyungkakka penatai pemisi rayat,” ku iya nerang.

Iya mega andal Bintulu entara bagi menua ba Sarawak ti deka ngasaika pemansang ti jampat nengah pengeransing perintah Sarawak.

“Kitai ngarapka pemansang ba sitak Bintulu deka terus dipajakka nengah arung jalai raya tu sereta pulaika pemaik ngagai sukut ekonomi peranak menua dia.

“Enda lama agi Jematan Kemena deka tembu tajapan napi penanggul sebedau tu.

“Nya alai sitak Bintulu, Jepak, Kidurong enggau sitak ke besemak Padang Bilun Bintulu mega deka disambung enggau jalai ti ngemuntangka sida ke nengah jalai nya,” ku iya nerang.

Nangkan ke nya, simpang beringkat Nyabau ke ngembuan 1.23 kilometer pemanjai nya deka besambungka tiga mengeri ba Sarawak iya nya Sibu, Bintulu enggau Miri ti nyadi sebengkah ari Jematan Lambung pemadu panjai ba Jalai Raya Pan Borneo Sarawak.

Projek Seksyen Nyabau nya berengkah 1 Mac 2017 lalu tembu kena 26 Januari 2022 nengah ungkus belanja manggai RM164 juta.-EDISI UKAS

add comment