Pengerembai Ekonomi Digital Nitih Pemansang Karan, Ai

HARI SATU, 21 FEBRUARI 2022

MIRI: Pengeransing numbuhka Ekonomi Digital ba taun 2017 empai nerima sambut ke manah ketegal rayat bedau nyemetak nemu pemesai guna pemansang nya.

Kepala Menteri, Datuk Patinggi Tan Sri Dr Abang Abdul Rahman Zohari Tun Datuk Abang Openg madah, iya nengkebang Ekonomi Digital ti dipunka enggau pengawa ngatur Gempuru Besai Ekonomi Digital Entarabansa Sarawak (IDECS) suba ketegal udah maya iya Sarawak nitih singkang pemansang teknologi digital dunya dikena ngubah tikas ekonomi nengeri tu.

Ketegal nya, iya udah ngungkupka agih belanja RM4 bilion dikena ngaga projek karan enggau ai ngagai rayat di menua pesisir.

“Mayuh orang madah, nama enda utai ku Abang Jo tu?. Tu nyadi ba taun 2017 alai maya nya aku bisi ngatur IDECS.

“Orang madah, menua pesisir agi empai datai karan, ai tang nyebut pekara digital. Nya alai, aku enggau liat ati ngungkupka belanja besai dikena ngaga projek karan enggau ai di menua pesisir.

“Nadai kala ba sejarah di Sarawak, kitai (Perintah Sarawak) ngungkupka belanja RM4 bilion dalam kandang dua taun dikena ngaga projek ai ba genturung pendiau tauka rumah panjai.

“Tu nyengkaum projek sistem solar tauka SARES ba Telang Usan enggau Mulu,” pia ku iya madah.

Iya bejaku munyi nya maya bejadika Aum Besai Dewan Usahawan Bumiputera Sarawak (DUBS) Pampang Miri Renggat Ke-14 di Miri, kena Hari Minggu tu tadi.

Nambahka jaku iya, Kepala Menteri mega madah, iya udah ngaga pemutus nambah RM2 bilion agi dikena ngaga projek karan di menua pesisir nengeri tu.

Pengawa sehari nya bela digulu Menteri Perengka Pengangkut Sarawak, Dato Sri Lee Kim Shin, Menteri Muda Pemansang Orang Indu enggau Nembiak Mit Datuk Rosey Yunus, Menteri Muda Pemansang Orang Dagang ke mega Kaban Kunsil Nengeri (ADUN) Lambir Dr Ripin Lamat, Kaban Parlimen Sibuti Lukanisman Awang Sauni, ADUN Pujut Adam Yii Siew Sang enggau Presiden DUBS Datu Abang Helmi Tan Sri Ikhwan.-EDISI UKAS

add comment