HARI DUA, 22 FEBRUARI 2022

KUCHING: Opis Menteri Raban Nembiak, Lumba Enggau Pemansang Orang Dagang Sarawak udah nyuaka geran ninting taun enggau penyampau RM5.041 juta ngagai 71 iti kelab enggau gerempung lumba di Sarawak.

Menteri ba opis menteri nya, Dato Sri Abdul Karim Rahman Hamzah madah, tuju geran nya diberi dikena nyaup ngemuntangka pengawa ngatur program enggau pekara bukai bekaul.

“Gerempung raban nembiak enggau lumba di Sarawak enti nunda chakah nengkebang penemu baru lebih agi ba pekara bekaul enggau teknologi digital ngambika ulih nyaup pemansang menua dudi hari ila.

“Nya alai, kitai andal amat enggau geran tu ulih ngemujurka pengawa enggau program ke diatur kelab enggau gerempung,” pia ku iya madah maya bejaku ba Pengerami Malam Masa Sereta Kerejasama Opis Menteri Raban Nembiak, Lumba enggau Pemansang Orang Dagang Sarawak (MYSED) di Kuching, kena Hari Satu.

Ba pengerami nya opis menteri tu bela bejadika Kalender Program enggau Aktiviti MYSED 2022 ti berambaika leka jaku “#Tiada Minggu Tanpa Program”.

Pengerami nya dipenyadika Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.-EDISI UKAS