HARI TIGA, 2 MARCH 2022
KUCHING: Peresa Sijil Pelajaran Malaysia (SPM) 2021 diatur ba serata menua berengkah sehari tu, 2 March nyentuk 29 March tu.
Direktor Opis Pelajar Nengeri Sarawak, Dr Norisah Suhaili, serak tu bisi 36,385 iku nembiak sekula di Sarawak ngambi peresa nya.
“Ari penyampau nya, bisi 34,142 iku (93.83%) nembiak ari Sekula Sekondri Perintah (SMK), 937 iku (2.58%) nembiak sekula sekondri luar lalu 316 iku (0.87%) nembiak ba baruh ejensi bukai kelimpah enggi Opis Menteri Pelajar Malaysia (KPM).
“Kelimpah ari nya, 26 iku (0.07%) nembiak ari Sekula Sekondri Agama Rayat (SMAR) enggau 964 iku (2.65%) nembiak ari palan peresa kediri,” ku iya maya dirandau media di SMK St. Joseph, Kuching kena Hari Tiga.
Nerang enggau silik, iya madah, di Sarawak peresa nya dipejalaika ba 257 palan peressa iya nya 189 di sekula sekondri perintah, enam palan peressa sekula ejensi ke bukai kelimpah enggi KPM, 13 palan peresa sekula sekondri luar, sebuah sekula sekondri agama rayat enggau 48 palan peresa kediri.
Pia mega ku iya, bisi 209 iku pengatur pengawa enggau 3,400 iku pengawas udah dichiri ngatur peresa SPM di Sarawak.
Nambahka jaku iya, iya mega madah, nembiak ke positif COVID-19 dipinta ngambi peresa nya bulan April tu ila. -EDISI UKAS
