Perintah Ngagih RM510 Juta Ungkup Projek Ai Di Betong

HARI TIGA, 2 MARCH 2022

BETONG: Perintah Sarawak enggau Perintah Besai udah ngungkupka RM510 juta dikena nentuka rayat di sitak Betong mengkang bulih ai beresi.

Menteri Utiliti enggau Telekomunikasyen Sarawak, Datuk Julaihi narawai madah, agih belanja nya nyengkaum 37 projek ba baruh projek rayat, projek tandu Langgur Pemansang Malaysia Lumpar Ke-11 (RMK11), projek ba baruh Opis Menteri Pemansang Menua Pesisir (KPLB) Malaysia enggau projek ba baruh Opis Pemansang Perintah Besai.

Ku iya, ari 25 projek rayat, 20 projek ke beungkus RM22 juta udah tembu digaga lalu empat projek ke beungkus urung RM189 juta benung digaga alai siti projek ke beungkus RM120 juta agi diperambu.

“Dua projek beungkus RM8 juta ungkup projek ke ditandu ba baruh RMK11 udah tembu digaga lalu tiga projek beungkus urung RM33 juta agi diperambu,” ku iya madah ba pengawa bejadika Opis Ai Menua Pesisir (JBALB) Baru Sitak Betong, kena Hari Dua.

Ku Datuk Julaihi nambahka jaku iya, bisi tiga projek beungkus urung RM74.9 juta udah tembu digaga ba baruh KPLB lalu siti projek bela digaga enggau agih belanja RM32 juta enggau diperambu sepenyampau RM15 juta.

“Projek ba baruh Opis Pemansang Perintah Besai bisi dua projek udah tembu digaga enggau agih belanja urung RM12.9 juta,” ku iya.

Kelimpah ari nya, naka ke diatu, iya madahka 93.8 peratus ari serata genturung pendiau di sitak Betong udah nerima ai beresi.

Nya alai iya andal juluk ati perintah ngemanahka sistem ai ulih mutarka penanggul ai beresi ba beberapa bengkah endur di sitak Betong nyema semua projek ke benung enggau diperambu tembu digaga.

Bela datai iya nya Sekretari Mendam Opis Menteri Utiliti enggau Telekomunikasyen Sarawak, Dato Ir. Alice Jawan Empaling, Residen Sitak Betong, Richard Michael Abunawas, enggau Direktor JBALB Sarawak, Ir. Chang Kuet Shian.  -EDISI UKAS

add comment