Gela Premier Sarawak Mai Besai Reti Ba Pekara Bekaul Enggau Hak MA63

HARI SATU, 7 MARCH 2022

SPAOH: Pemutus nganti gela Kepala Menteri ngagai Premier Sarawak siti ari pemutus ke besai dikena mulaika baru hak nengeri tu baka ke udah disemaya dalam Sempekat Malaysia 1963 (MA63).

Sapit Premier Sarawak, Datuk Amar Douglas Uggah Embas madah, pemutus nya digaga dikena meri banding Sarawak enggau nengeri bukai bukai dalam Malaysia.

“Sarawak siti ari kandang menua kelimpah ari Sabah ti numbuhka menua tu,” iya madah munyi nya maya bejadika Aum Besai Pati Tiga Taun Sekali ungkup Pati Babu, Bangkit enggau Suri Parti Pesaka Bumiputera Bersatu (PBB), kena Hari Minggu.

Ku iya, hak ke bukai bela diteruska udah Perintah Sarawak mujur netapka chukai (SST) ngagai PETRONAS ungkup asil ari produk petroleum.

Kelimpah ari nya, Datuk Amar Douglas minta rayat Sarawak terus nyukung Perintah Gabungan Parti Sarawak (GPS) baka ke udah diayanka ba pemujur Pengawa Bepilih Besai Nengeri (PRN) tu tadi.

“Pemujur GPS bulih 76 ari 82 kerusi maya PRN-12 nandaka rayat Sarawak lantang ati enggau pengeransing Perintah Nengeri ti udah bebendar mulaika hak kitai ngelama tu,” ku iya madah.

Pia mega iya madahka aum besai pati nya diatur dikena nentuka raban baru ke biak ulih nyadi tuai ke chakah mutarka isu ba genturung pendiau sida.

“Kitai begunaka sida ti bepengelandik mansutka penemu dikena nyaup bala tuai ngatur pekara bekaul.

“Nya alai rayat nengeri tu mega tau besaup nyungkakka tikas pengidup sida nengah Pelin Pemansang Udah COVID-19 (PCDS) 2030,” ku iya nambah. -EDISI UKAS

add comment