HARI TIGA, 9 MAC 2022

MUKAH: Rayat Sarawak ditangkan ngambika enda saru enggau gela Premier Sarawak dikena nyilih Kepala Menteri ke udah dikemendarka Kunsil Nengeri (DUN) Sarawak kena 15 Februari tu tadi.

Menteri ba Opis Premier Sarawak, Datuk John Sikie Tayai madah, gela nya dikena meri banding ngagai Sarawak enggau nengeri bukai ke nyadi siti ari menua ti numbuhka serakup Malaysia baka ba Sempekat Malaysia 1963 (MA63).

Iya nerang, gela nya deka nyadi pemun pemujur ngagai pengawa negi sereta ngambi pulai hak Sarawak nitihka sempekat nya.

“Gela Premier tu endang senutuk enggau penuduk Sarawak ba Malaysia laban kitai enda baka nengeri bukai, Kelantan tauka Selangor ti ulih ngena gela Kepala Menteri.

“Kelimpah ari nya, Menteri Muda ke dikena sebedau tu bela disilih enggau gela Sapit Menteri berengkah 1 Mac 2022,” pia ku iya madah.

Iya bejaku munyi nya maya Program Pemesai Begulai Enggau Rayat DUN Kakus ba Rumah Jeffery Irut di Lubok Bukut, Balingian ditu, kena Hari Satu tu tadi.

Ba pekara bukai, Datuk John Sikie madahka Perintah Sarawak semampai bebendar deka ngaduka pemansang menua pesisir nyengkaum ngaga 3,000 tiang telekomunikasyen ba serata Sarawak ke diatu benung digaga enggau chara berenggat.

Kelimpah ari nya ku iya, pengeransing perintah tu bela dipeda ari pengawa ngaga pemansang baka jalai alun enggau ai beresi.

“Enti sebedau tu jalai tunga kitu (Lubok Bukut) balat jai. Nya alai, aku endang bebendar deka meda rumah panjai ditu disambung jalai.

“Kitai beterima kasih laban Perintah Gabungan Parti Sarawak (GPS) udah mayuh ngaduka pemansang ketegal ngira pengelantang rayat,” ku iya madah baru.

Ba pengerami nya, iya bisi nyuaka geran Projek Mit Menua Pesisir (MRP) RM10,000 ngagai Biro Raban Indu Komiti Pemansang enggau Pengelikun Genturung Pendiau (JKKK) Rumah Jeffery, JKKK Rumah Jeffery (RM19,000), Rumah Jimin (RM22,000), Rumah Steven (RM19,000) enggau Rumah Jarau (RM15,000).-EDISI UKAS