Lima Tokoh Orang Indu Diberi Basa Ba Pengerami Ngintu Hari Orang Indu Sarawak 2022

HARI TIGA, 9 MARCH 2022

MIRI: Pengerami Ngintu Hari Orang Indu Sarawak ke diatur kena 8 March tiap taun dikena meri basa pemujur orang indu Sarawak ba mayuh bengkah pengawa lebih agi sida ke udah ngangkatka nama Sarawak enggau Malaysia.

Pengerami Ngintu Hari Orang Indu Sarawak 2022 keterubah diatur di Miri nya mandangka pengawa nyuaka lima Anugerah Tokoh Orang Indu ti disuaka Menteri Pemansang Orang Indu, Nembiak Mit enggau Pengelantang Mensia Mayuh, Dato’ Sri Fatimah Abdullah, kena Hari Dua.

Lima anugerah tu iya nya ‘Anugerah Premier Sarawak, Kepimpinan Wanita’ ke diterima, Datin Aisah Eden, ‘Anugerah Premier Sarawak Usahawan Wanita’ diterima Sandra Trinata Kolarensius Sugeng enggau ‘Anugerah Premier Sarawak Penggiat Sosial’ diterima Raja Noor Akmar Raja Kamil.

Kelimpah ari nya, dua agi anugerah iya nya ‘Anugerah Khas Premier Sarawak In Scholarly Writing’ disuaka ngagai Dr Lulie Meling enggau ‘Anugerah Pertubuhan Cemerlang’ diterima Kuching Autistic Association (KAA).

Pemberita Unit Komunikasi Awam Sarawak (UKAS) bisi ngerandau penerima ‘Anugerah Premier Sarawak Penggiat Sosial’, Raja Noor Akmar Raja Kamil.

Iya madahka diri berasai temegah ati ketegal sepengelama 30 taun bebendar ngereja pengawa rama nerima sukung ari bala kaban iya lalu diberi basa ari perintah Sarawak.

Bela dirandau, penerima ‘Anugerah Khas Premier Sarawak In Scholarly Writing’, Dr Lulie Meling ngarapka orang indu ke bukai ulih bebendar ngulihka juluk ati sida. -EDISI UKAS

add comment