Malaysia Nyingkang Ngagai Renggat Sebedau Endemik Berengkah 1 April 2022

HARI TIGA, 9 MARCH 2022

KUALA LUMPUR: Malaysia deka berengkah nyingkang ngagai renggat sebedau Endemik belabuh ari 1 April tu.

Menteri Besai Malaysia, Dato’ Sri Ismail Sabri Yaakob bela madah, pintu penama tauka entara menua Malaysia mega deka dibuka bepun ari pemutus nya.

Iya madah, pemutus nya digaga bepelasarka mayuh pekara kelimpah berate nama ke tau nyadi nyengkaum bepintaka penemu Opis Menteri Pengerai sereta berundingka tangkan ari Menteri Kuartet.

“Renggat nyingkang ngagai Endemik tu nyadika ‘exit strategy’ kitai dikena mulaika baru pengidup baka selama udah nyauka dua taun betapi enggau COVID-19.

“Renggat tu enda lama sebedau menua kitai datai ba renggat Endemik alai pekara nya nitihka padah ari Gerempung Pengerai Sedunya (WHO),” ku iya ba aum media khas di begunan Parlimen, kena Hari Dua.

Ba pemutus muka pintu penama ngagai menua tu, Menteri Besai nyemetak madah, pemutus nya endang digaga bepelasarka penemu ke ulih mai Malaysia nyadi menua tebuka ti tau dilawa baka suba.

“Pemutus tu digaga bepelasarka tiga pekara iya nya Sains enggau pekara ke pemadu baru ti bekaul enggau COVID-19, mandingka pekara muka pintu penama menua bukai enggau meri pengelantang ngagai orang bejalai lalu ulih ngemuntangka pejalai sida.

“Batang pekara ti dikemerat iya nya Malaysia nyadi menua tebuka ti tau dilawa baka suba lalu rayat Malaysia ke bisi dokumen pejalai sah diatu ulih tama pansut baka selama sereta diberi pemendar ngelawa menua bukai ke bela muka pintu penama sida,” ku iya madah. -EDISI UKAS

add comment