HARI EMPAT, 10 MARCH 2022
KUCHING: Perintah Sarawak begunaka saup sektor korporat dikena bejadika pemansang ekonomi baka ba Pelin Pemansang Udah COVID-19 Sarawak (PCDS) 2030.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, sektor korporat tu baka industri Badan Berkanun, Syarikat Berkaitan kerajaan (GLCs) enggau pemesai korporat.
Ku iya, saup sida deka nyadi injin pemansang sereta nempa penatai nengeri nengah pengawa bekenaka model dagang baru mulaika penguntung ari Pulangan Pelaburan ke positif (ROI) Perintah Nengeri kelimpah bekenaka pengelandik bejalaika pengawa dagang ti inovatif ari pengelebih ba perengka guna tauka teknologi digital ke dikembuan.
“Baka ba PCDS 2030, Sarawak ngembuan juluk ati deka nyungkakka pengerembai ekonomi kitai ari RM136 bilion ba taun 2019 ngagai RM282 bilion manggai taun 2030.
“Dikena kitai bejadika juluk ati tu kitai mesti bisi pengerembai eknomi lapan peratus ninting taun,” ku iya madah.
Iya bejaku munyi nya nengah teks ke dibacha Sapit Premier Sarawak, Datuk Amar Douglas Uggah Embas maya pengawa nutup Forum Kepimpinan Digital “Driving Business In Pandemic Times” di Khazanah Auditorium Asia School of Business, Kuala Lumpur, kena Hari Tiga.
Bekaul enggau forum nya, iya madah, program bekaul deka dipejurai nyengkaum pekara ke deka ditapi sektor korporat lebih agi ba pengawa bejalai dagang maya pandemik tu.
“Ba jeman digital kelimpah pandemik tu, nadai organisasyen ulih beretan kediri lalu ketegal nya saup bebala mayuh beguna amat,” ku iya madah baru. -EDISI UKAS
