Perintah Sarawak Semampai Meri Kelala, Negika Hak Tanah NCR Rayat

HARI EMPAT, 10 MARCH 2022

SONG: Perintah Sarawak semampai meri kelala sereta negika hak rayat ba Tanah Hak Adat Bumiputera (NCR) sida bepelasarka undang-undang.

Sapit Menteri Pengatur Mengeri, Tanah enggau Rampa Menua Sarawak, Datu Len Talif Salleh madah, pekara tu berupai dipeda ari pengawa meri Surat Pala Tanah Seksyen 18 Kanun Tanah Nengeri (KTN) ngagai rayat.

“Pengawa nyukat tanah NCR tu udah dikereja kenyau ari taun 1960 suba.

“Lalu ba taun 2010, perintah numbuhka chara baru dikena nyukat tanah ngambika pengawa nyukat tanah lengkas agi diatur,” pia ku iya madah maya Pengawa Nyuaka Surat Pala Tanah Seksyen 18 KTN enggau Lesen Pendudukan Sementara (TOL) Pelilih Song, kena Hari Tiga.

Nambahka jaku iya, Datu Len madah, naka bulan Februari taun tu bisi 1,023,292 hektar tanah udah disukat lalu 793,831 hektar agi mujur digazet.

Awak nya mega dikena iya ngelalau rayat semampai nyukung pengawa nyukat tanah NCR ngambika pengawa nya mujur dikereja.

Ba pengawa nya, 274 iti Surat Pala Tanah disuaka ngagai 189 iku penerima di pelilih Song ke mungkur menua Mukeh Katibas, Sipan, Sesawa enggau Telok Jambu, Song.

Kelimpah ari nya, 122 Lisin TOL disuaka ngagai penerima ari Skim Gempuru Renggat I, Song, Skim Gempuru Renggat II Song enggau Skim Nangkir Genturung Pendiau Renggat II.

Pengawa sehari nya bela digulu Kaban Kunsil Nengeri (ADUN) Katibas, Lidam Assan. -EDISI UKAS

add comment