HARI LIMA, 11 MARCH 2022

KUALA LUMPUR: Perintah Besai deka majakka pengawa mulaika hak Sarawak baka ba Sempekat Malaysia 1963 (MA63).

Menteri ba Opis Menteri Besai (Pekara Sabah enggau Sarawak), Datuk Seri Panglima Dr. Maximus Ongkili madah, tu nyengkaum Opis Menteri Wang Malaysia deka ngatur randau begulai enggau Perintah Sarawak enda lama agi bekaul pengawa mansik baru ungkup agih khas baka ba Perkara 112D Konstitusyen Besai.

“Kelimpah ari nya, aum kaunsil khas bekaul enggau MA63 deka diatur kena 14 March tu ti bela deka bejuraika pekara bukai,” pia ku iya madah maya nimbal tanya Kaban Parlimen Serian, Dato’ Sri (Dr) Richard Riot Jaem ba aum Dewan Rakyat, kena Hari Empat.

Kelimpah ari nya, iya mega madah, pekara bekaul tanah, kuasa ba pekara rampa menua sereta pekara besai ke bukai bela deka dirandau.

Iya nyemetak madah, semua tu dikereja enggau betandu ti mega bepelasarka peminta sebedau tu baka mulaika kuasa megai pengawa ba gis, nyungkakka tikas lisin berikan lebuh tasik enggau meri gazet Akta Konstitusyen (Ubah) 2022 [Akta A1642] ti nyengkaum ngubah Perkara 1 (2), 160 (2), 161A (6) enggau (7) Konstitusyen Besai.

“Ari saup Menteri Besai, beberapa iti batang pekara deka dipadahka kitai taun tu bepun ari pemutus ke deka digaga,” ku iya nerang. -EDISI UKAS