HARI LIMA, 11 MARCH 2022

SIBU: Sida ke beempu tanah ti ditujah projek pemansang deka diberi pampas nitihka atur Opis Tanah enggau Servei Sarawak.

Sapit Menteri Pengatur Mengeri, Tanah enggau Rampa Menua Sarawak, Datu Len Talif Salleh nyemetak madah, pengawa nya dikemeranka Perintah Sarawak nyerumba pengeransing mai pemansang lebih agi baka jalai alun tauka jematan ba menua tu.

“Endang enda ulih diseliahka bisi maya pengawa ngaduka bayar pampas baka tu dipetalatka tang naka ke diatu pekara tu ulih diatur kitai enggau lebas,” pia ku iya maya dirandau ba Pengawa Nyuaka Chek Pampas Tanah Projek ‘Baleh – Mapai 500kV Overhead Transmission Line (Sibu Sector – Section E) di Sibu, kena Hari Empat.

Maya nya, iya nyuaka 101 iti chek pampas tanah ke beungkus RM1,641,151.25 ngagai 73 penerima kelimpah bela bisi nyuaka 182 surat pala tanah Seksyen 18 Kanun Tanah Nengeri (KTN) ngagai 150 iku sida ke beempu tanah ari Pasai Siong.

Gazet Komunal Bumiputera Seksyen 6 KTN enggau pemesai 6,492 hektar mega disuaka ngagai 56 penerima ari Kanowit enggau Sepiring di Ulu Balingian.

Dulu ari nya, maya bejaku ba mua bala mayuh, Datu Len madahka projek karan nya digaga dikena mai kuasa karan ari Tekat Ai Baleh ngagai sistem grid Sarawak ti beguna bendar lebih agi udah Koridor Kuasa Tau Dikena Baru Sarawak (SCORE) belabuh ditumbuh.

“Pekara tu deka ngemunka pemansang ekonomi menua tu empu.

“Tu seririh enggau pengeransing Perintah Sarawak nyungkakka pemansang ngelawa tuju bejadika juluk ati nyadi nengeri mansang manggai taun 2030,” ku iya madah baru.

Pengawa sehari nya bela digulu Kaban Kunsil Nengeri (ADUN) Machan, Allan Siden Gramong, ADUN Ngemah, Anyi Jana enggau Penulung Direktor (Tanah) Opis Tanah enggau Servei Sarawak, Unus Tambi. -EDISI UKAS