HARI ENAM, 12 MAC 2022

KUCHING: Perintah Gabungan Parti Sarawak (GPS) dibaruh iring Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg chukup ngemeratka pemansang ba sitak menua pesisir.

Sapit Premier Sarawak, Datuk Amar Douglas Uggah Embas madah, enti diperati perambu pemansang ungkup taun tu, bisi 64 peratus ari penyampau nya ba menua pesisir.

Nya alai, nya ke tanda perintah Sarawak nadai ngelaungka pemansang ba menua pesisir.

“Polisi tu nyengkaum pekara ke dikena kitai ngemansangka kandang menua pesisir lalu kitai deka nentuka menua pesisir ba serata menua Sarawak enda tinggal pemansang.

“Nyadi, aku ngarapka rayat ba nengeri tu semampai mereti ka pengeransing kami bebendar deka ngemansangka nengeri Sarawak, “ku iya madah munyi nya ba pengawa nutup ‘workshop’ Pengkalan Data Penyambung Jalai Ungkup Sitak Menua Pesisir bepalan ba Damai Beach Resort, kena Hari Lima apin lama ke udah. 

Tandu iya, perintah diatu benung nempa Sarawak nyadi siti menua bepenatai pemisi tinggi nyengkaum ba menua pesisir nengah Pelin Pemansang Udah COVID-19 (PCDS) 2030.

Urung 180 penyereta ari bemacham ejensi teknikal enggau ukai teknikal bisi ngambi bagi ba ‘workshop’ nya ke dibagi ngagai tiga raban nitihka bagi menua diri.

Pengawa nya diatur dikena ngemaruka status penyambung jalai raya ngagai rumah ba menua pesisir ba Sarawak, ngeripihka projek enggau agih belanja nitihka bagi menua ungkup pengawa ngemanah sereta ngaga baru lalu ngelangkar  program dikena ngemujurka pengawa ngemanahka jalai nuju rumah ba menua pesisir.

Bela bisi datai, Sapit Menteri Infrastruktur enggau Penyangkai Kapal (Pemansang Infrastruktur), Ir. Aidel Lariwoo. -EDISI UKAS