HARI MINGGU, 13 MAC 2022

ENGKELILI: Opis Kaunsil Pelilih Lubok Antu (MDLA) Engkilili udah mujur ngatur sebengkah randau begulai enggau pengeluar lisin ba sitak ke dikuasa sida diatur ba Dewan Serbaguna MDLA kena Hari Empat tu tadi.

Tuju pengawa nya dikena nangkan bala pedagang patut ngemaruka lisin sida ninting taun ngambika enda kena tinggang ukum nitihka akta pelesenan 1994.

Ba randau nya, bisi dipadahka barang sapa deka minta lisin baru bedagang ba rumah panjai patut ngisi pom ke mesti diaku tuai rumah diri enggau raban MDLA.

Pengawa ngemaru lisin nya mega mesti digaga dalam kandang timpuh ke udah ditetap iya nya berengkah 1 Januari nyentuk 11 Februari ninting taun dikena nyeliahka penyampau bayar sida betambah.

Tang, enti nyema orang ke ngempu lisin nya udah midang, kelalu tuai tauka enda dapat agi bedagang sida ulih berandau enggau raban MDLA minta lisin nya dikinsil awakka nadai agi bebayar.

Berebak enggau nya mega, bala pedagang ditangkan seruran nitihka atur ke udah dipadah dikena nentuka semua pengawa nya dipejalai enggau mujur.-EDISI UKAS