HARI MINGGU, 13 MAC 2022
KUCHING: Peranak Kampung Tanjong Bako, Kuching diatu tuchum gaga laban Perintah Besai udah ngemendarka agih belanja sepenyampau RM3.6 juta dikena ngaga baru Masjid Darul Abidin.
Kaban Parlimen Santubong, Dato Sri Dr Wan Junaidi Tuanku Jaafar madah, Masjid Darul Abidin ke beumur 40 taun nya begunaka langkar ke baru ngambika likun sereta lantang endur raban Muslim ke majak nambah.
“Projek ngaga baru Masjid tu mega dikena raban kariah masjid bejalaika pengawa sembiang sida enggau lantang agi.
“Peranak genturung pendiau ditu berasai lantang ati ketegal penyiru perintah udah ngemendarka peminta tu.” ku iya madah maya ba Program Begulai Enggau Rayat (PMR) ba Kampung Tanjong Bako, Kuching kena Hari Minggu.
Nya alai, agih belanja nya nyengkaum dikena ngererak enggau ngaga baru Masjid Darul Abidin Kampung Tanjong Bako.
Seninjik ari nya, iya ke mega Menteri ba Opis Menteri Besai (Parlimen enggau Undang- Undang) meri terima kasih ngagai Menteri Besai, Datuk Seri Ismail Sabri Yaakob laban udah ngamatka juluk ati peranak genturung pendiau nya.
Dulu ari nya, maya ngabas empat buah ruang bilik ke tasah angus ba genturung pendiau nya, Dato Sri Wan Junaidi mega bisi nyuaka bantu sepenyampau RM50,000 ngagai sida ke tasah.
Agih belanja nya dikena ngaga baru rumah sida nengah chara beripai.
Nya alai, iya ngarapka bantu nya ulih ngelempungka mimit tating penusah ke ditapi raban sida ke tasah.-EDISI UKAS
